‘Cinîye hêvî û bingeyê komelî ya’

NÛPELDA TÊKOŞÎN / DELÎLA AXÎN / JINNEWS / ŞENGAL

Şengal de pêwa heme zor û zehmetîyan cinîya bi nameyê Xezal Hamoya ke dewa Barî ya Şengalî de manena, fêkiyan çînena û debara xo bi rotişê înan kena. Xezale vana cinîyî hêvî û bingeyê komelî yê û ganî cinîyî wayîrê keda xo bivejîyê.

Xezal Hamoye dîyar kerde ke aye xebate ra zaf hes kena û wina va: “Dewa ma ya bi nameyê Barî de bexçeyê ma esto. Ma mîyanê bexçe de încîr, hinare, zerdalî û çîyanê bînan resnenê. Dima ra ma roşenê û ma pê debara xo kenê. Nika zî seba zimastanî ez hinaran wişk kena. Seba ke fêkîyê ke ma çînenê tebîî yê, seba weşîya merdiman zî baş ê. Wexto ke ez şina mîyanê bexçeyê xo û warway pay herre nana, ez aram bena. Ez zaf herre û bexçeyê xo ra hes kena. Wexto ke ez debara xo bi destê xo kena, ez hîna bihêz bena. Pêşnîyazê mi heme cinîyan rê o yo ke wa bixebityê û hêz xebata xo ra bigirê.”

Xezale qiseykerdişê xo wina qedênaye: “Fermanê 3ê Tebaxa 2014î ra dima xeylê êzidî ameyî koçber kerdene, remnayene û qetil kerdene. Nika pêwa heme zehmetîyan ma hewl danê ke cuyêka newe awan bikerê. Ma wazenê heme êzidîyî biagêrê herra xo ser. Şengal her ca ra weşêr o, herra kalik û pîranê ma yo. Ez zaf kêfweş a ke serê herra xo de xebitîyena û bi keda destê xo debara xo kena. Cinîye hêvî û bingeyê komelî ya. Ganî heme cinîyî bixebityê û wayîrê keda xo bivejîyê. Ez do heta peynî vera neheqîyan de têkoşîn bida û wayîrê keda xo bivejîya.”