Cinîyê koçberî zeytûnan arê danî

LÎLAV ELÎ / JINNEWS / ŞEHBA

Cinîyê efrînijî ke hêrişan ver mecbûr mendî Efrîn ra koçê Kantonê Şehba kerdî, Şehba de hesadê zeytûnan dest pêkerd. Cinîyê ke dewa Wehşîyê ra ameyî, serê sibayî saete 6.00 de dest bi karî kenî, ge-ge deyîran vanî.

Cinîyan ra Fatma Ehmede dîyar kerde ke arêdayîşê zeytûnan karêko zehmetin o û wina va: “Ma 14 cinîyî serê sibayî saete 6.00 de şonî hêgayan de xebetîyenî. Ma debara xo hêgayan ra kenî. Seba ke ma pereyê xo qezenç kenî, kêfweş î. Hêrişê Efrînî ra dima dewleta tirkî qetlîyamê tebîetî kerd. Ma do Efrîn azade bikerî û biagêrî hêgayanê xo.”

Xedîce Mistoye zî wina va: “Ma nika erdanê xo ra durî yî. Labelê wa Erdogan bizano ke têkoşînê cinîyan dewam keno. Ma tîya de bi zehmetêko gird xebetîyenî. Ma destê xo vernîya ti kesî de nêakenî. Ma wina kenî ke dişmenê ma, ma rê nêhuyî û ma do têkoşînê xo bidomnî.”