Cinîyî bi werdî destek danî xoverdayîşî

DILÛCAN BOZÎ / JINNEWS/KOBANÊ

Hêrişê dagîrkerîye yê artêşa tirk û çeteyanê ci ke 9ê Teşrîna verêne ra nata dewam kenî, herçiqas ke 17ê Teşrîna verêne de bi îlankerdişê adirbirnayîşî tayê kêmî bibî zî hîna xeylê nuqtayan de hêrişî dewam kenî.

Goreyê îzehetê Meclîsê Sûrîyeya Demokratîke roja ke hêrişî dest pêkerdî ra nata 300 hezar merdiman ca û warê xo ra koç kerdo. Îzehet de hûmara kesê ke merdî 235 ameya dayene û nînan ra 22ê ci doman î û 677 kesî zî birîndar bîyî.

Cayê ke bîyî hedefê hêrişan ra yewe zî Kobanê ya. Cinîyê ke Kobanê de cuyenî, seba domananê xoverdakaran werd pewjenî û bi no hewa destek danî xoverdayîşî. Cinîyî wayîrê têkoşînê domananê xo vejîyenî û her roje grûbanê cîya-cîyayan reyde werd pewjenî. Cinîyan ra Neyma Qadire bale ante hêrişan ser û wina va: “Ma cinîyî ameyî têhet û domananê xo rê werd virazenî. Ma do bi piştîdayîşê domanan nê şerî bivindarnî. Ma verê cû keyeyê xo ra werd erşawitêne, labelê nika ma komun de werd virazenî. Çi destê ma ra bêro ma do bikerî.”

Cinîyan ra Eyşa Ehmede zî va ‘ma cinîyî seba ke domanan rê werd virazî, ameyî têhet’ û wina dewam kerde: “Ma fek Kobanê ra veranêdanî. Ma hemleya Minbicî de zî domananê xo reyde bîy. Ma bi ruhê komunalî pîya xebetîyenî.”