Cinîyê dêrsimîjî seba 8ê Adare Roja Cinîyê Kedkarî yê Cîhanî amadekarî kenî. Cinîyê ke amadekarîya 8ê Adare kenî, mîyanê înan de cinîyê kedkarî ke bi Qerarnameyê Hukmê Qanûnî (KHK) karî ra amebî îxraçkerdiş û ameyî tewqîfkerdiş zî estî. Babete ser o Hemsereka SESî ya Şûbeya Dêrsimî Nurşat Yeşîle qisey kerde û seba mîtînga ke do bi Platformê Cinîyê Dersimî bêro viraştiş veng daye.
Yeşîle va ‘bi îlankerdişê OHALî zext û tedayê dewlete vejîyayî dûştêko tewr berz’ û wina domnaye: “Sendîkaya SESî ke awanbîyayîşî ra nata cinîyî bi hawayo hîra tede ca gênî zî nê tedayan ra para xo girewtî. Ma seba ke mîyanê SESî de cinîyî hîna zaf ca bigirî sîstemê hemserekî û temsîlkarîya seyyewbînanî ard. Qezencê ma hetê sîstemî ra yenî xespkerdiş.”
Cinîyî taxan de yî
Yeşîle dewamê qiseykerdişê xo de wina va: “Her hetî de zehmetîyê girdî yenî cuyayîş û bitaybetî cinîyan ser de zext û tedayî zêde bîy. Ma ancax bi vejîyayîşê rasteyan eşkenî vera nê zext û tedayan de bivinderî. No proses de karî ra îxraçkerdiş hîna zaf cinîyan ser de yeno kerdiş. Ganî cinîyî wayîrê heqanê xo bivejyî. Her çiqas ke bêro astengkerdiş zî ez veng dana heme cinîyan ke wa beşdarê mîtînga ke 8ê Adare de Rasteyê Seyyîd Rizayî de bêra viraştiş bibî.”
ŞÛJIN/DÊRSIM