YAŞAR AKSU / ANF/RIHA
Seke yeno zanayîş 18 serrî yo ke Rayberê Şarê Kurd Abdullah Ocalanî binê tecrîdêkî de yo. Bitaybetî 27ê Temmuze ra nata avûkatê Ocalanî nêşenî muwekkîlê xo reyde pêvînayîş bikerî û reyna tewr peynî birayê Ocalanî Mehmet Ocalan 11ê êlula 2016î de şîbî Îmrali û pêvînayîş kerdbî. O tarîx ra nata Ocalanî ra ti xebere nîna girewtiş.
Babete ser o Parlamentera HDPyî ya Riha Dîlek Ocalane qisey kerde. Dîlek Ocalane va '18 serrî yo ke şexsê Rayberê Şarê Kurd Abdullah Ocalanî de ser şarê kurd û Rojhelato Mîyanên de tecrîd yeno meşnayîş' û wina dewam kerde: "Îqtîdarê AKPyî hewl dano sîyasetêko rizîyaye bido meşnayîş. Polîtîkaya Îmrali bêçaretîya îqtîdarî ya. Na bêçaretî îqtîdarî ver bi şerî kiranta. Heta ke problemê kurd çareser nêbo, Tirkîya û Rojhelato Mîyanên krîz ra nêvejîyenî."
Heqê esasî yê kurdan ameyo xespkerdiş
Ocalane va 'nizdîbîyayîşê şarê kurdî de şîddet zêde beno û no zî yeno manaya do krîz hîna zaf kûr bibo' û wina domnaye: "Bê kurd çareserîyêk mumkin nîyo û ganî herkes nêyî bizano. Problemê kurdî problemê dinya yo. Êdî îmkanê bêstatu mendişê şarê kurdî ke nufûsê ci qasê 50 mîlyon o, çin o. Sey her şarî heqê kurdan zî esto ke qederê xo dîyar bikerî. Heqê kurdan yê esasî ameyo xespkerdiş."
Ma do têkoşînê xo bidomnî
Dîlek Ocalane qiseykerdişê xo de bale ante kampanyaya ke hetê Tevgerê Cînîyanê Azade (TJA) ra ameya destpêkerdiş ser û wina va: "Nika Birêz Ocalanî ra ti xebere nîna girewtiş. Pêvînayîşê ci yê roşanî zî ame astengkerdiş. Do waştişê azadîya cinîyan na polîtîkaya rizîyaye ya îqtîdarî bivindarno. Ma do bi kampanyaya TJAye ke bi şîyarê 'Do tecrîd vînî bikero û azadî qezenç bikera' yewna rey nîşanê herkesî bidî. Cinîyî do tecrîdî bişiknî. Cinîyî bi vatişê 'azadîya Rayberîye azadîya heme şaran o' heta ke azadîya komelî bêro qezençkerdiş, têkoşînê xo bidomnî."