Cinîyê ke Binarê Qendîl de cuyenî, seba ke helawa (dims, mot, rib) tuyan bivirazî dest bi kar kerdî. Hamnanî wextê vejîyayîşê tuyan o û no semed ra cinîyî tuyanê ke arê danî reyde helawe virazenî.
Seke yeno zanayene helawa tuyan sere de rîşa merdimwere û xeylê nêweşîyanê bînan rê derman a û şar zaf bikar ano. Cinîyan ra Gul Hesene qala viraştişê helawa tuyan kerde û wina va: “Wexto ke tuyî deresîyenî, ma binê daranê tuyan de naylon rakenî û ciwanî vejîyenî daran ser û roşanenî. Tuyê ke yenî arêdîyene pak benî û erzîyenî qazikan mîyan. Badê ke saetêk yenî girênayene, erzîyenî poşetan mîyan û kerrayî ronîyenî poşetan ser o. Eke tuyî awa xo veradayî, na reye nizdîyê 4-5 saetî yenî girênayene û erzîyenî kawanozan mîyan.”
Cinîyan ra Meyr Ehmete zî bale ante feydeyanê helawa tuyan ser û wina va: “Eke keso ke nêzanbo, nêşeno helawa tuyan bivirazo. Çimkî eke kêm yan zî zêde bêro girênayene, tehmê ci weş nêbeno. Eke baş bêro amadekerdene, xeylê nêweşîyan rê derman o. Bitaybetî seba bêgonîtîye, kuhike û rîşa merdimwere rê baş a. Bitaybetî helawa ke destan reyde yena viraştene pak a û feydeyê ci hîna zaf a.”
ROJNEWS / QENDÎL