Seba yadkerdişê Sakîne Cansize, Fîdan Dogane û Leyla Şaylemeze ke 9 Çeleyê 2013 de Parîs de û Sêvê Demîre, Pakîze Nayire û Fatma Uyare ke 5ê Çeleyê 2016 de Silopîya Şirnex de amebî qetilkerdiş, Dêrsim û Êlih de merasîmî ameyî organîzekerdiş.
3 cinîyê şorişgerî ke Parîs de ameybî qetilkerdiş, înan ra sîyasetmedara cinîye Sakîne Cansize serrgêra xo ya 4. de Dêrsim de mezelê xo ser de ameye yadkerdiş.
Zaf cinîyî beşdarê merasîmê yadkerdişî bîyî û merasîm bi rêzgirewtiş dest pêkerd. Rêzgirewtişî ra dima sloganê ‘Embaza Sara bêmerg a’ ameyî eştiş. Cinîyê mezelê Cansize ser de mumî tafînayî, qerenfîlî ronayî mezelî ser.
Merasîm ra dima welatîyî hetê polîsan ra nuqtaya sehnayîşî ya Sutluce de ameyî vindarnayîş û kontrolê nasname ame kerdiş. Kontrolî ra dima destûr ame dayîş ke welatîyî derbaz bibî.
Têkoşînê cinî ameyo hedefgirewtiş
Êlih de zî cinîyî seba yadkerdişî merasîm organîze kerdî. Merasîmo ke bi rayberîya Tevgerê Cinîyan yê Azad (TJA) de Rêxistina DBPyî ya Qeza de ame viraştiş rê, Îdarekarê DBP û HDPyî, endamê TJA û zaf cinîyî beşdar bîyî. Merasîm de pankartê ‘Xoverdayîş de israr, cewabê komplo yo’ amebî aliqnayîş. Merasîm bi rêzgirewtiş dest pêkerd û dima ra qerenfîlî ameyî vilakerdiş.
Verfeka TJAye Songul Korkmaze merasîm de qisey kerde û wina va: “Qirkerdişê ke ameyî viraştiş, têkoşînê cinîyan hedef girewtî. Labelê yê ke vanî qey têkoşînê cinîyan biqedênî, mîyanê şaşîyêka gird de yî. Ma do xoverdayîşê azadî ra fek veranêdî û ma do hesabê ci bipersî.”
Merasîm bi nawitişê sînevîzyon û deyîrvatişê hunermendanê NÇMyî qedîya.
DÎHABER / DÊRSIM