Qezaya Hewengî ya Riha de citkarê pemeyan zêdebîyayîşê vayayanê toxim, gubre, mazot, darû û awe ver gerrekar î. Citkaran vera her roje zêdebîyayîşê vayan de reaksîyon nîşan da û dîyar kerd ke eke wina bibo ê do nêşênbî peme bironî.
Citkaran ra Mûrat Aslano ke 13 serrî yo Taxa Yalaxî de peme roneno, da zanayene ke awa ke dîyena ma vay a û wina va: “Ma emser 45 dolimî peme rona û heta nika 40 hezar TL mesref şîyo. Par awe 110 TL bî, emser bîya 165 TL. Îxtîmal esto ke serrna do bibo 200 TL. Eke wina bibo ma do senî qezenç bikerî.”
Aslanî dewamê qiseykerdişê xo de va ‘ma hêgaye kîra kerda’ û wina dewam kerd: “Nika peme pîyasa de 2 TL 80 Quriş ra yeno rotene. Wexto ke peme yeno arêdayene, o wext vaye hîna zaf kewena. Par ma 3 TL û nîme ra rot. Emser kirmî peme de virazîyayî û ma zî zaf darû da bide. Heta nika ma 6 reyî darû da bide. Seba ke ma qezenç bikerî, ganî ma kîloyê ci 4 TL ra biroşî. Ma kîloyê toximî 14 TL ra herînabi. Ma par 70 dolimî ronabi, labelê ma emser 40 dolimî rona.”
Ez do serrna peme nêrona
Salih Yildirimo ke 10 serrî yo dewa Salûca Henderî de peme roneno zî wina va: “Par şûşêyêk darûyî 50 TL bi, emser bîyo 200 TL. Herçiqas ke mazot, darû û gubre vaye bîyo zî peme ercan o. Mi 15 dolimî peme rona û eke zaf baş bibo ma eşkenî ti ra 500 kîlo peme bigîrî. Labelê emser vaya pemeyî kêmî ya. Heta nika mi 15 hezar TL mesref kerdo. Êdî peme heqê xo nêvejeno, ma zirar kenî. Ez do serrna nêrona.”n MA / RIHA