Bajarê Manîsa de engure, hêjîr û sewbîna fêkî û sewzeyê tewir bi tewir resenî û 227 hezar keyeyî zî bi citkarî debara xo kenî. Tirkîya de erdê tewr baş, Hewzaya Gedîz û Deşta Manîsa yî. Manîsa de 5 mîlyon û 140 hezar dolime erdê zîretî estî. Labelê polîtîkayanê hukmatî ver erdê zîretî bin tedhîdêko gird de yî. Babete ser o Serekê Odaya Muhendisê Zîretî Îbrahîm Demranî qisey kerd.Demranî qiseykerdişê xo de wina va: “Erdê Manîsa dewlemend î. Şarê dewan koçî bajaran kenî û çareserîya debara keyeyê xo sanayîyê bajaran de vînenî. Tena extîyarî dewan de mendî. Koçkerdiş erdê zîretî ser de tesîrêko pîl viraşt. Rotiş erzan, herînayîşê gubre û dermanan zaf vay o. Her çîyê zîretî teberê welatî ra yenî. Her ke dovîz beno vaye citkarî mexdur benî.”
Çareserî kooperatîfbîyayîş o
Demranî vatişê Wezîrê Zîretî yê Çelîkî ke vatbî ‘ma nêwazenî linganê muhendîsanê zîretî de cizmeyan bivînî’ ard vîr û qiseykerdişê xo wina qedêna: “Ma zî nêwazenî ke cizmeyan pay bikerî. Labelê na zî raştî ya ke; debara ma bexçe û erdan ra yena. Eke rewşa karê muhendîsan bêra başkerdiş do erdê zîretî de herînayîş û rotiş zî baş bibo. Ganî citkarî bêrî pawitiş. Kooperatîfbîyayîş do vernîyê koçan bigîro.”
CÎHAN BAŞAKÇIOGLU / DÎHABER/MANÎSA