Qezaya Cizîrî ya Şirnexî de ciwanê bi nameyê K.D, S.M, L.A û N.O yo doman ke wextê qedexeyê tebervejîyayîşî de merdimê xo pêrodayîşan de vînî kerdî, dîyar kerdî ke tayê kesê ke xo sey polîsê îstîxbaratî danî şinasnayîş, înan gêrenî û ajanîye înan ser de danî ferzkerdiş. Nê kesî aşkere kerdî ke nê kesê ke xo sey polîsî şinase kenî, telefonê înan kenî û înan tacîz kenî.
Nê ciwanan ra K.Dyî va ‘ez verê cû bi îdîaya endamê rêxistine bîyayene ra zîndan de menda’ û wina dewam kerd: “Wextê kewtişê qeza de nuqtaya polîsan de mi ra vatî ‘Heqê to de qerarê tewqîfkerdişî esto’ û mi wesayît ra peya kerdî. Dima ra polîsê îstîxbaratî ameyî. Wexto ke mi belgeyê tewqîfbîyayîşî waştî, mi ra vatî ‘belgeyî rayîr de yî’. Bi no hawa derheqê mi de zanayîşî girewtî. Çend rojî ra dima polîsî mi gêrayî û waştî mi bivînî. Mi rê otoparkêk tarîf kerdî. Wexto ke ez şîya otoparke, ewja de bi pere ajanîye pêşnîyazê mi kerdî û mi ra vatî ke do dosyayê to bikewî. Mi qebul nêkerd. Na rey fotografê mi antî û mi bi tewqîfbîyayîşî tehdît kerdî. Labelê mi reyna zî qebul nêkerd. Dima ra bi wesayîtêko sîvîl mi teber de ronayî.”
Hesabê tayê kesan mi ra waştî
S.Myî dîyar kerd ke eynî nuqtaya polîsan de dest ronîya telefonê ci ser û zanayîşê ci yê taybetî ameyî girewtiş û wina va: “Polîsan hûmara kesê ke lîsteya mi ya telefonî de estbî, girewtî û hesabê înan yê medyaya komelkî zî mi ra waştî. Zaf reyan mi gêrayî. Çend reyan ma hetê Nêweşxaneyê Dewlete yê Cizîrî de nê kesê ke xo sey polîsî şinase kerdî reyde pêvînayîşî viraştî. Mi ra vatî ‘ma to rê muhîmat temîn kenî, ti tayê kesan seba çalakîye îqna bike. Ti înan bîyare cayê çalakîye, ma hal kenî’. Labelê mi qebul nêkerd.”
‘Ti heme çîyî qebul bike’
L.Ayî zî va ‘bi nameyê Şeyhmusî de kesek mi taqîp kerd û ajanîye pêşnîyazê mi kerd’ û wina domna: “Polîsî waşt ke ez tayê kesan reyde dîyalog rona. Polîsan mi ra va ‘eke ê to ra vajî sîlehan zî bîyare bajar, ti qebul bike. Ma do wina bikerî ke ti do bi hawayo asan nuqtaya sehnayîşî ra derbaz bibî. O wext do to ra bawer bikerî. Eke lazimî bibo, beşdarê çalakîyan zî bibe, labelê wa haya ma bibo’.”
N.Oyo domanî zî wina va: “Kesê ke xo sey endamê îstîxbaratî nîşan dayênê, hertim bi telefonî mi tacîz kerdênê. Badê ke mi keyeyê xo ra va. Keyeyê mi dozgerî reyde pêvînayîş viraşt û dima ra fek mi ra veradayî. Wexto ke mi tiryak girewtêne ez ameya tepiştiş û seba ke mi ajanîye qebul kerd, mi serbest veradayî. Mi tayê zanayîşî dayî înan. Labelê keyeyê mi şîyî dozgerî û emnîyet. Ê telefonê ke mi gêrayêne, heme padîyayî. Êdî mi eciz nêkenî.”
MA/ŞIRNEX