Dûştê polîtîkayê qirkerdişî yê hukimatê AKP, Ciwanê Azayê Halkevlerî zî nêrazîbiyenê xo mojnay û hersê xo ardî ziwan. Azayê Halkevlerî Can Çelîker dîyar kerd ke hukimatê AKP demo ke Kurdistan de qirkerdişan keno, rojawanê Tirkîya de zî hewl dano ke rayvistişê şorişgerî teslîm bigiro û wina verdewam kerd: “Faşîzmê Qesrî terseno ke hêzê YPS yê Kurdistanî de xover danî, neslê Gezî reyde destê yewbînan bigirî.” Çelîker her wina ard ziwan ke Serekkomar Erdogan wazeno Tirkîya de goreyê xo pergalêko awan bikero, Erdogan seba ke bieşkero dîktaya xo xurt bikero, do faşîzmê Hîtlerî Tirkîya de bidomno.
Xendek û barîqatî
Çelîker bal ant ser xoverdayîşê rayberîya cewherî ya Kurdistanî û qalîkerdişê xo wina dewam kerd: “Seba xendekê ke ser esasê xorayîrberdişî yenî awankerdiş, rojawanê Tirkîya de biagêrî barîkatan, hamleyeke newe ya şorişger lazim a. Wa çeperê xoverdayîşî bêro akerdiş.” Çelîker dîyar kerd ke ê zî do pey barîkatan xover bidî, bi nê vatişan veng da ciwanan û dîyar kerd ke ê do xendekê rojhelat û barîkatê rojawanî bikerî yew. Azayê Halkevlerî Tugçe Işik zî destnîşan kerd ke Kurdistan de şar dijî hêrişê faşîst ê dewlete de xover danî û aşkera kerd ke seba ke verê qirkerdişan bêro girewtiş wa vengê şaran berz bibo. Işik bal ant ser xoverdayîşê cenî yê Kurdistanî zî û no dergî da qiseyê xo: “Seba cenîyê ke Kurdistan de pey xendekan de xover danî, wa cenîyî pey barîkatan de zî xover bidî. Ma raşteyan de pîya şer bikerî û bi no rengî verê şerî bigêrî.”
Ciwan dînamîkê vera faşîzmî yê
Ergîn Çevîk zî dîyar kerd ke AKP wazena xoverdayîşê şarî yê Kurdistan de têk şîro û wina verdewam kerd: “ Faşîzmê Qesrî, verba têkoşînê hembarê şarê kurd û tirkî yê dijî faşîzmî ra terseno. Wa hêzê şorişger cayî ke biagêrê çeperê xoverdayîşî, wa ma faşîzmê AKP hem Kurdistan de hem zî Rojawanê Feratî de teng bikerî û AKP têk berî.”
Çelîk dergeyîya qiseyê xo de vîr ard ke ciwan dijî faşîzmê dînamîkê xoverdayîşî yê û qiseyê xo wina peynî kerd: “Ciwanê Kurdistanî bi rayvistişê YPS raştî bi awayo ke tewr bi çim nîşan dayî. Ez veng dana ciwanan ke bi ser faşîzmê AKP de meşnenî.”
DÎHA/STENBOL