SEMRA TURAN / MA / DÊRSIM
Bi nameyê Erdal Sezîşî de kesêk Dêrsim de atolyeya hunerî akerda û Sezîş dewê ke serranê 90î de veşnayî de çîyê veşateyan arê dano û atolye de açarneno çîyanê hunerîyan. Sezîş 2 serran de nizdîyê 100 dewan de gêrayo û çîyan arê dano.
Sezîş cewherê nê çîyan nêbedilneno û goreyê cerebnayîşan şekil dano ê çîyan. Sezîş bi îmkananê keman na xebata xo domneno. Sezîş ewil çîyanê xo axurêk de kom kerdo û dima ra ê axurî açarnayo atolye. Sezîş heta nika tayê eserê ke amade kerdî, seba rotişî nîşan dano.
Sezîşî va ‘seba ke hunerêk bivejîyo raşte, ganî merdim bişênbo bi hawayêko cîya biewnîyo’ û wina domna: “Eşqê mi yê ahşabî domanîya mi ra yena. Ez wazena ehşab û kulturê dewan yê Dêrsimî pîya nîşan bida. Ez fikirîyena ke ameyoxe de sergîyêk akera. Ewro kulturê ma çinêbîyayîşî reyde têrî yo. Kulturê ma bi veşnayîşê dewan ame talankerdene. Cok ra ez çîyanê veşateyan arê dana û ser o xebetîyena. Ez boya bikar nêana, tena zeyt û çîyo pawitoxî bikar ana. Amancê mi o yo ke ez muzeya kulturê akera.”