SEYÎT EVRAN / RÊBAZ HÊSEN / ANF/ SILÊMANÎ
Rayberê Şarê Kurd Abdullah Ocalan 18 serrî yo ke zîndan de hucreyo yew kesî de maneno û 1 serrî ra zêde yo ke ti xebere ci ra nîna girewtiş.
Babete ser o nuştox û pawitoxê heqê merdiman qisey kerdî û vera tecrîdî de reaksîyon nîşan dayî.
Nuştox Alî Kerîmî va ‘rewşa Ocalanî û tecrîd êdî meseleyêka neteweyî derbaz kerdî û nika bîyî rewşêka merdimî’ û wina dewam kerd: “Birêz Ocalan nizdîyê 20 serrî yo ke zîndanêko yew kesî de maneno. 2 serranê peyênan de zî nêşêno ti kesî reyde pêvînayîş bikero. Ganî kurdî heme cayê dinya û Kurdistan de bivejîyayênê ziqaqan û reaksîyon nîşan bidayêne. Erdogan ewro şexsê Ocalanî de vera kurdan de jehr, hêrs û reaksîyon nîşan dano. Ganî ma nika bivatêne Ocalan kura de yo, senîn o û çira binê tecrîdî de yo û ma qiyamet biqerfnayêne.”
Ganî Ocalan azade bibo
Nuştox Latîf Ferecî zî wina va: “Seba ke Ocalanî rîyê rastikênî yê Erdoganî nawit, ewro tecrîd ame girankerdiş. Wa dewleta tirk bi hawayo baş bizano ke eke çîyêk bêro sereyê Rayber Apoyî, do bi hezaran Apoyî bibî. Rojêkî mi Wan û Heskîfî zîyaret kerd û ewja de domanêkî ame hetê mi. Mi ey ra pers kerd ‘ti wanenî an nê?’, ey va ‘ez seba Tirkîya nêwanena’. Wexto ke mi pers kerd, ‘ti nêwanî, ti do se bikerî?’ Mi ra va ‘ez do biba gerîla’. Wa dewleta tirk baş fam bikero. Tirkîya nika adirî reyde kay kena. Ganî Rayber Apo nika Amed de bibîyêne. Eke Amed de bibîyêne mîyanê şaran de dişmenî nêmendêne. Eke çîyêk bêro sereyê Rayber Apoyî, ma do dinya sereyê înan ser de birijnî.”
Tirkîya sucê huqûqî kena
Huqûqnas û pawitoxê heqê merdiman Aram Haciyî zî va ‘Tirkîya goreyê peymanê mîyanneteweyîyan sucê huqûqî kena. Wexto ke merdim Beyannameyê Unîversalî yê Heqê Merdiman ra ewnîyeno, vîneno ke nê heqî bîyî 3 beşî. Wexto ke merdim doza Rayber Apoyî ra ewnîyeno, vîneno ke her hîrê heqî zî ameyî îxlalkerdiş. Ewro têkilîya Ocalanî bi keye, avûkat û teberî reyde ameya birnayîş. No sucê huqûqî yo.”