Li navçeya Cizîrê ya Şirnexê û navçeya Nisêbînê ya Mêrdînê gel li hember dîwarê şermê û têlên li sînorê Roboskî hatine dayîn mîtînga şermezarkirinê hat lidarxistin. Ji aliyê Navenda Giştî ya BDP’ê ve bi armanca şermezarkirina têlên ku li ser sînorê Roboskî hatine danîn û “dîwarê şermê” yê li Nisêbînê ji bo mîtînga li Cizîrê bi deh hezaran welatî li qada mîtîngê ya li ber Nexweşxaneya Dewletê ya Cizîrê kom bûn. Girseya ku li ber avahiya partiyê kom bû ji wir jî ber bi qada mîtîngê ve meşiya. Li qada mîtîngê welatî li ber stranan govend gerandin. Rêveberên BDP´ê jî wê tevlî mîtîngê bibin û derbarê dîwarê şermê yê li Nisêbînê û têlên li Roboskiyê li ser sînor têne tanîn peyamên girîng bidin.

Gel dîwarê şermê hilweşand

Li navçeya Nisêbînê ya Mêrdînê bi hezaran welatiyan dîwarê şermê hilweşand. Ji bo şermezarkirina dîwarê şermê doh li Nisêbînê meşeke protestoyî li dar ket. Parlementerê Serbixwe yê Mêrdînê Ehmed Tirk, Parlementera BDP’ê ya Êlihê Ayla Akat Ata, Parlementerê BDP’ê yê Mêrdînê Erol Dora, Înîsiyatîfa Dayîkên Aştiyê, MEYA-DER, Serokên Şaredariyan, xebatkarên çandê yên li Qoser û Nisêbînê  beşdarî meşê bûn. Pankarta li ser “Em ê dîwarê şermê bi serê Komara Tirkiyeyê de birûxînin”, “Em ê tola Geverê hilînin”  nivîsandî hat hilgirtin.  Wêneyê Rêberê Gelê Kurd Abdullah Ocalan, alên KCK’ê û PKK’ê jî hatin hilgirtin û slogan hatin qêrîn.. Her wiha di çalakiyê de şoreşa Rojava û berxwedana YPG’ê jî hat silavkirin. Dema ku Parlementera BDP’ê ya Êlihê Ayla Akat Ata dest bi axaftinê kir, gel dest bi xirakirina dîwarê şermê kir. Xelkê kurd ê li Rojavayê Kurdistanê jî alîkarî da xelkê Nisêbînê. Li ser vê yekê polêsên dewleta tirk bi bombeyên gazê û ava şid êrîşî gel kir. Di êrîşê de gelek welatî brîndar bûn. Piştî êrîşa polêsan xelkê navçeyê li gelek kolan û taxan li pêş polêsan bent danîn û dest bi şer kirin.

DÎHA/NISÊBÎN/ŞIRNEX