Quwetanê dewleta tirk verîya serrekê bi tank û topan eşt qezaya xoverdayişî Cizîr ser û bi desan kesan qetil kerd. Bi fermanê serokkomar û hikûmeta AKP bi desan kesî bodriman de ganî bi ganî amey veşnayiş, qetilkerdiş. Cizîrijê ke hona dirbetê ci akerdeyê dê referandûmî de no zilmê dewleta tirk ra vajê bes o. 

Esnafanê Cizîr ra Abdullah Ozcanî aşkere kerd ke iyê dê verîya her çî mabêna xo de ‘Nê’ rêxistin bikerê. Ozcanî vist vîrî ke tarîxa Tirkîye de heta nika cayê kurdan çîn o û va, “Seba ke qanûno bingeyî de zilm û zorvajîya dewleta tirk ya ser şarê kurd û pêrokîn şaran wedarîyo û her kes heqê azadî bigîro dest, ganî pêrokîn şarê Tirkîye û Kurdistan dest bidê yewî û xo tenzîm bikerê. Hinî herkes wayîrê heq û îrade yo, nayî ra zî kesê ke nêwazenê welatî de zilm xorî bibo dê babeda serokîye rê vajê ‘Nê’.”  

Qanûnê ke mîyan de kurd çinîbê ma qebûl nêkenê

Abdullah Ozcanî da zonayen ke AKP bi polîtîkayanê xo tîvarîya canê înan zî nêverda yo û wina dewam kerd: “Nika Tirkîye de tîvarîya kesî çîn a. Kar û gureyê ke îdarekarê AKP Tirkîye û Kurdistan de bikerê ma  qebûl nêkenê. Rîwalê hêrsa AKP bi hezaran ciwanê kurd zîndanan de yê û amey kişten. Ewro herkes wayîrê heqî yo, la quwetanê dewlet heqê kurdan vindî kerdo. Ma dê vajê nê, çike hinî ma wazenê derheqê ciwîyayişê xo de bi xo qerar bidê. Qanûnê ke mîyan de kurd çinîbê ma qebûl nêkenê. 

Ma Cizîr xo vîr ra nêkerd

Cenîya ciwan Elîf Deger zî hayr ancena zorvajîya dewlet ya bi serran ser  û aşkere kerd ke hikûmet ewro zî wazena pêrokîn ray û raybazan qanûno bingeyî bivistîyo destê ci. Deger veng da şarê kurd ke destûr nêdê ke rayveberê AKP înan bixapînê û seba ‘Nê’ herkes hişyar bo. Deger zî da zonayen ke a do zî referandûmî de vajo ‘Nê’. 

Welatijan ra Ayşe Geçmez zî dîyar kerd ke a hemverê referandûmî yê û qiseyanê xo wina domna: “No 2 serrîyo şarê kurd hewl dano ke dirbetanê xo derman bikero. La ewro tayî werzenê û vanê ka ma  referandûmî virazê. Wa bîrê ma ra pers bikerê. Ma Cizîr hona xo vîr ra nêkerd. Cok ra ez a vaja ‘Nê’, ‘Nê’, ‘Nê’. 

‘Vajê ‘Nê’ hinî bes o’

Dayîka bi nameyê Salîha Yanar ke lajê ci Kasim Yanar qedexeyê 14ê Kanûna 2015’î de cêrzemînî de şehîd kewt dîyar kerd ke senî ke înan weçînayinanê verênan de Erdoganî nêkerd serok, na qorî zî iyê dê nêkerê. Salîha Yanar vist vîrî ke bi serrano bi sebebê serokîye sermîyananê dewlet kurdan rê zilm kenê, înan veşnenê û wina va: “Kesê ke îmana ci esta iyê dê biageyrê û Şirnex, Cizîr, Nisêbîn, Sûr, Silopî û Gever biewnê û vengê xo bidê û hemverê na talanî ra vajê ‘Nê’. Vengdayişê ma noyo ke wa Kurdistanijî her ca de xo rêxistin bikerê û vajê hinî ‘Nê’, bes o no zilm û zorî rê. 

‘Ma yew ala, yew ziwan, yew mîletî qebûl nêkenê’

Nesîbe Çagirga zî aşkere kerd ke ê yew ala, yew ziwan, yew mîletî qebûl nêkenê û waştena haştî û aramî kerd. Çagirga vist vîrî ke her çi qe kurdî vanê ma waûbirayê pê yê, bêrê ma pîya bicuwîye, ê bi tanq û topan cewab danê û va, “Ma zî vanê ma kurd ê û ma wayîrê heqî yê û ma vanê ‘Nê’. 

Cinîya bi nameyê Zeycan Taşkin ke demê qedexe de merdeyê ci Cabbar Taşkinî weşîya xo kerd vinî zî aşkere kerd ke bado ke hendayî kes amey kiştiş û tepiştiş ê nêwazenê Erdogan bibo serok. Taşkin veng da herkesî ke hemverê kampanyaya AKP bivejyê, heq û îradeyê xo bişuxilnê û vajê ‘Nê’.   


 DÎHABER/ŞIRNEX