Qezaya Semsûr Kolik de cotkarê ke bi pereyanê jêde serayan akerdî, rîwalê zerarî gerre keno. Tirkîye de bi berzbîyayişê Dolar û Euro, vernîya krîzê ekonomîk nîno girewtiş. Tewr vêşêr zî cotkarî na krîzî ra tesîr benê. Cotkarî diyar kenê ke ê nêşkenê gubre, leye bigîrê û fatûrayanê xo yê elektrîkî bide.
Nê cotkaran ra yewe zî Cîhan Îlyasoglû yo ke no çehar serrîyo ser erdekî 6 donimî de xebetyeno û bi nayî debara xo keno. Îlyasoglû o ke pîyê 3 domanan o, aşkere kerd ke no 2 serranê peynî de cayo ke qezenc bikero de zerar kenê.
Ma zerar kenê
Îlyasoglû da zonayen ke înan serva sera nezdîye 700 hezar TL mesref kerdo û wina dewam kerd: “Rîwalo ke îxracat nêbeno çîye ke serayanê herema Antalya de resenê rişîyay bazarê Tirkîye. Cok ra vayê mehsulan kewt. Mesrefê ma yê heftane 4 hezar TL yo. Wexto ke ma mehsulanê xo bin 2 TL de roşenê ma zerar kenê. Ma gureyenê yê mavênkarî qezenc kenê.” Îlyasoglû vist vîrî ke bi sebebo ke ê netîceyê emegê xo nêgînê bezar bîye û endî nêşkenê no karî biramnê.
Pêrokîn karî cinî ramnenê
Cinîya bi nameyê Medîne Polatli ke aşmanê hamnanî de karê mewsimanîye de, zimistan de zî serayan de xebetyena. Polatli da zonayen ke bi sebebo ke merdeyê ci kar nêvîneno tenya a bi xo gureyena. Medîne Polatli vist vîrî ke karê sera kareke zehmet o û va, ‘pêrokîn karê tîya cenî ramnenê.’
Gurekara bîn Zubeyde Baylan zî ana zon ke rexmo ke karê înan zaf zehmet û giran o la rexmê nayî zî ê netîceyê emegê xo nêgênê. Baylan ana ziwan ke ê seatanê sodir ra heta şanî gureyenê û vana ke eke ê mecbûr nêmanê nêşnê no karî de nêxebetyenê.
DÎHABER / SEMSÛR