Sema Yuce çalakîya xo ya fedaî ra ver mektûbêk verdabî û mektûba xo de vatbî ‘ez seba ke biba şagirtê Mazlûm Doganî, wazena sey Zekîye veşa û sey Rahşane biba Newroze’ û Yuce bi na çalakîya xo bîya sembolê têkoşînê azadîya Kurdan. Cok ra ewro cinîyî hewl danî qerardarîya Yuce şexsîyetê xo de awan bikerî.

SÎBEL OZALP / JINNEWS / AMED

Sema Yuceya ke 21ê Adara 1998î de xo veşnaybî, 17ê Hezîrana 1998î de şehîd bîbî. Yuce bi zerrî û bedenê xo mabênê 8ê Adare û 21ê Adare de bîbî pirdêk. Yuceya ke çalakîya xo ra 80 rojî dima resaye şehadetî, xo dima kulturêkê xoverdayîşî mîras verda û bî sembolê têkoşînê azadîya cinîyan.

Ewro serrgêra 21. ya şehadetê Sema Yuce yo. Yuce wexto ke çalakîya xo viraşte, xo dima mektûbêk verdabî û mektûba xo de vatbî ‘ez seba ke biba şagirtê Kawayo Hemdem Mazlûm Doganî, wazena sey Zekîye biveşa û sey Rahşane biba Newroze’ û wina domnabî: “Cinîyî kileya adirê Kurdan ke bîyo wel î. Cinîya ke welê xo ra newe ra xo xelq bikera û biba kilaya newe ra bîyayîşî, aye bena awankarê Kurdîstanê azade.”

Ewro têkoşînê azadîye Sema hîna zaf aver şîyo û her ke şono girdêr beno. Cinîyê ke têkoşînê azadîya Kurdan de ca gênî, hewl danî qerardarîya Sema Yuce şexsîyetê xo de bidî roniştene û têkoşînê ci danî. Sema Yuce vera dej, asîmîlasyon û bênasnametî de taqîbkarê kulturê xoverdakarî bî.

Têkoşînê cinîyan aye ser o tesîr keno

Sema Yuce serra 1971î de qezaya Dutaxî ya Agirî de ameya dinya û dibistanê seretayî dewa xo de wendo. Yuce dima ra lîse Agirî de wendo û mîyanê keyeyêkê ke Şêxitîye tede hakim a de bîya pîl. Seba ke dewe û keyeyê aye de xeylê kesî nizdîyê problemê Kurdî de mendî, aye de zî eleqeyêk virazîyayo. Yuce lîse ra dima Anqara de unîversîte qezenç kena û ewja de zî serkewtişêko gird nîşan dana. Sema Yuce beşdarbîyayîşê têkoşînî ra ver hem mîyanê keyeyî de û hem zî hetê dormeyê xo ra zaf yena heskerdene û rêz ci rê yeno girewtene. Sema bi peymitişanê xo xeylê kesan ser o tesîr kena û zaf erj dîyeno aye. Çîyo ke aye ser o tesîr keno zî têkoşîno ke cinîya Kurdî koyanê Kurdîstanî de dana ya. Sema hîna destpêkê unîversîte de PKK şinasnena û 1991 de Mêrdîn de beşdarê PKKyî bena.

22 serrî cezaya zîndanî dîyena Yuce

Yuce mîyanê PKKyî de her hetî ra beşdarê cuye bena û hewl dana lazimîyanê donem û prosesî fam bikera. Seba bitaybetî babetanê sey ‘Cinîya Kurdî kam a?’, ‘Cinîye çi ya?’, ‘Ganî vindetiş û rolê cinîye senî bibo?’, ‘Cinîye eşkena şoriş de rolêko senîn kay bikera?’ û sewbîna ser o vindena û hewl dana nê hetan de xo bikera pispor. Yuce netîceyê îxbarêkî de Agirî de yena tepiştene û dima ra hetê mehkeme ra yena tewqîfkerdene. Mehkeme de 22 serrî cezaya zîndanî dîyena Yuce û ewil erşawîyena Zîndanê Nevşehîrî, dima ra zî erşawîyena Zîndanê Çanakkale.

Sema wazena şêra cenetê Zîlane

Sema Yuce badê ke 6 serrî zîndan de manena, 21ê Adare de xo veşnena. Embaza aye ya zîndanî Sureyya Bulute dîyar kena ke wexto ke Sema betanîye mîyan de koguş ra ameye vetene, siloganê aye yê peyêne ‘Ma do destûr nêdî ke şima bidî domananê ma ro’ bi. Yuce badê ke bi hawayo birîndar wedarîyena nêweşxane, ewja de yena tedawîkerdene. Yuce dayîka xo ra vana ‘Ez wazena şêra Bexçeyê Cenetî ke Zînê ra mîras menda û hetê Zîlane ra ameya xelqkerdene’. Yuce nizdîyê 80 rojî nêweşxane de manena û 17ê Hezîrane de şehîd bena. Dayîka Yuce Zennure Yuce şehadetê kênaya xo ra dima qiseykerdişêkê xo de derheqê manaya çalakîya kênaya xo de vatbi ‘Sema bîye Zîlane’.