Jû mordemek. Serokkomar, serokwezîr, wezîrê karê zerrî, wezîrê karê teverî, serokê AKP û hukumat. Jû dîktator. RTE her çiyê tirkan o. Ahmet Davutoglu, Bulent Arinç, Yalçin Akdogan, Beşîr Atalay û îyê bînî pêro muyê qine yê. Par mîtîngê AKP yê Kizilçesme de jû cenîka kêmaqile vat bî: “Erdogan, ez muya qina to bî!” Îşte sermiyan û îdarekarê AKP kî niya rê. Pozîsyonê xo çi beno bibo, pêro maske yê, tolik yê. Qesê xo perenêkeno, se vanê vazê, peyniye de RTE qerar dano. Anqara de teyna jû mordemek wayîrê qerarî yo. Recep Tayyîp Erdogan.
Seke Kobanê seweta ma kurdan biye sembola xoverdayîşî û weşiye, seweta Erdogan kî biye sembola merdene û telef biyayene. RTE pêro omidê xo rêxistina îslamî ya terorîste DAÎŞ ra giredayî bî. Hen zonenê ke DAÎŞ seke Musul teslîm guret, Kobanê kî hen teslîm ceno. La, jê her tim, RTE û dewleta tirkî onca kurdî famnêkerdî. Na mordemekî hewn diyenê û vatenê “Kobanê ha ginê waro, ha ginena waro!” û biyenê sa. Hama Kobanê 43 rozî yo dana pêro, payra ya û rêxistina RTE, DAÎŞ ha kena vîndî, ha kena vîndî. Tabî, eke DAÎŞ darbe ceno, Anqara de RTE darbe weno, dezeno û berveno. Xoverdayîsê Kobanê yê 43 rozî kîmya RTE raştke kerde xirave.
Na semed ra xo ver ra qeseykeno. Nî rozan de her kesî jê terorîst vîneno û terorîstê xo DAÎŞ rê kî yardim keno. Hîre hetê Kobanê DAÎŞ gureto, hetê çorînê kî eskeranê RTE gureto. Eskerê RTE şîndor de erzenê şarê ma yê Bakurî ser. Hetê ra “demê haştiye” ra qesey keno, hetê ra her roz PKK û PYD jê rêxistinanê terorîst nîsan dano. Ebi na hal haştiye-maştiye nêbena.
Hata 3 serrî ra avê vatenê “Ma cîrananê xo rê dismeniyê nêkeme û sifir problem wazeme.” Nika ciranê dormê Tirkiye pêro biyê dismen. Suriye de qe tekîliya xo çîna, Îran û Iraq de onca henî. Dugelanê NATO de dano pêro, RTE. Rîwalê  kurdan ra Amerîka kî endî gureta verva xo. Zor keno ke Amerîka jê ey PYD jê rêxistina terorîste bivîno. La Amerîka çond reye kerd eskera ke, a na derheq de jê hukumatê tirkî nêfikrîna. Endî nimtkî niyo, NATO verva çeteyanê DAÎŞ dano pêro, RTE teyna seweta DAÎŞ dano pêro. Tam biyo jû daîşîst.
 Lewê nî meselan de hen oseno ke niyadayîsê homet û çapemeniye dîna yê kurdan endî vuriyo. Hama hama her roz çapemeniya dîna de RTE rexne beno. Hata, endî NATO ra tever estena Tirkiye yena wastene. Na bena nêbena, nêzoneme, la hata mesela Kobanê kesî çiyo niyanen fekê xo ra nêvetenê. Na semed ra dugelê NATO gune rast ke dostenya xo yê Tirkiye sero rind bifikriyê. Kobanê misna ma, kurdî besekenê xo verva DAÎŞ bipawê. La verva DAÎŞ pêroddayene teyna karê kurdan niyo. Na rêxistina terorîste pêro dîna tehdît kena. Endî bî zelal: hukumatê AKP lewê DAÎŞ de ca ceno. Nêzon dugelanê NATO ça virare fîşta na qefçiliye ra ranêverdanê.