Qezaya Çewlig Darahênî de dewanê Botyan, Murtezan, Mîstan, Waremerg, Serdew, Heştere ke nezdîyê Lîce yê de xedeqeyê vejyayişê kuçe ronîya. Ame zonayene ke eskeran xo telanê (erazîyê) birrî de nimito. Mezrayanê girêdayê dewa Botyan Zekûnî, Mîyaron, Serleton, Xuluncuk, Gemevil, Dereşuv, Kaxkik, Ezînan, mezrayanê girêdayê dewa Mistan Dêhl, Serla, Riz, Dizik, Şelê û mezrayanê girêdayê dewa Murtezan Dewaselçuk, Filmome de operasyonê eskerî ramenê. Goreyê vatenanê çimeyanê heremî xêlê lejkerî ronîyayî nê mintiqeyan.
Lejkerê ke mintiqe de bi ca bîyê destûr nêdanê ke dewijî heywananê xo vejerê teberê dewî û biçernê. Nê cayê ke behsê ci yeno kerden de hereketîna Heron ra pîya êrişê hetê helîkopterî zî benê. Herzewbîn dekewtişê Darahênî de Qereqolê Yayla yê Cendirmeyan û Qereqolê Tapantepe de noqteyê geyrayişî ronîyayî. Geyrayişî seatanê ver şanî de benê vêşî û ronişteyê dewan bi seatan yenê pawitene.
Gimgim de lejkerî bi ca bî
Gimgim de zî çolwarê dewanê Qulan, Gulîce û Baska de operasyonê lejkerî virazîya. Herzewbîn goreyê zonayişan mavêna dewanê Qeremêş û Goma Gorgo de zî operasyon esto. Çolwarê dewanê girêdayê qezaya Mûş Gimgim Qulan, Gulîce û Baska de bi tewrbîyena bi seyan lejkeran operasyon virazîya. Yekîneyê lejkeran ke bi wesayîtanê sivîl şî herem çolwarê dew de girê (tepe) stratejîk de bi ca bî.
Goreyê vatenanê çimeyanê heremî mavêna dewanê Gimgim Qeremêş û Goma Gorgo de zî mintiqeya darîn û kinarê çemî de zî operasyonê lejkerî virazîyeno.
DÎHA/ÇEWLIG/MÛŞ