Qezaya Çewlig Darahênê de malbata Elîveren ke wayrê dikanî bî, serra 1999î de 8 hezar dolar deyn da fermandarê emniyetê Darahênê. Peycoy malbatî deynê xo peyser waşt la raştê tehdîdanê fermandar A.K amey. Nî tehdîdan ra çend rojî tepya, wendekarê lîse Mehmet Elîveren û Yilmaz Elîveren’î dikanî girotî û kewtî raya keye. La wendekarî veriya ke biresê keyeyê xo hetê polîsan amey kişten. Badê kiştişî, hurdî wendekarî zî zey ‘terorîst’ amey damusnayen.
Badê kiştenê Elîveren’an polîsan zer malbatî de zext û zorvajî kerd û day goçkerdiş. Cipersyayişo ke hetê Sawcitiyê Bîngol derheqê panc polîsan de abiya de gencî zey ‘terorîstî’ amey biname kerdin. Badê wextekê zî dawa girotiya. Serra 2013 de dosyeya dawa reyna abiya.
Çarçoveyê cipersyayen de jew polîsî zey “şahîdê nimite“ îfade da. No polîsî da zonayen ke tifinganê 5 PKKyijê ke ‘98î de amey kişten ra jûya ci bi di bombeyan ra piya roniyay cesedanê Elîveren’an het. Bi nay aşkere bi ke gencî hetê kê ameyê kişten.
Dosya amê giroten
Bi nê îfadeyan ra piya îstiqametê dawa vurniya. Derheqê fermandar A.K û polîsanê herekatê taybet B.G, A.K.Ç, M.A û M.Y de rîwalê sûcanê ‘tehdît’, ‘sextekarî’, ‘kiştiş’ de bi waştenê hepsê timûtimî îdianame ame hadre kerdin. Çarçoveyê dawa de 7 roniştenê amey diyayen, la polîsî tewrê nê roniştişan nêbî, waştena tepiştişê polîsan zî her tim red bî.
Roniştişê qerar yê dawa veriya çend rojan Mahkemeya Cezayê Giran yê Bîngol de ame diyayen. Heyetê mahkeme bi behaneyê ’nêbiyayişê delîlan’ û rîwalê vûrnayenê wextî polîsanê kiştox bê ceza verada û dosya girot.
Mahkeme kiştoxan sevekna
Pawitoxê malbatî û Serokê Baro yê Çewlig Abdûllah Alakûş’î da zonayen ke no qerarî wijdanê hometî kerd dirbetin. Alakûş’î aşkere kerd ke rixmê delîlan qerarekê winayîn nîno giroten û hina va: “Her tim quwetê dewlet hetê mahkemeyan ameyê seveknayen (pawiten). Qerar hiqûqî niyo”. Alakûş’î da zonayen ke rexmê vatişanê ‘şahidê nimite’ û sextekariyê belgeyan, dawa bi zanabiyen amê giroten û aşkere kerd ke îye de dawa bikirêşê mahkemeya berz. Parlamenterê HDP yê Çewlig Hişyar Özsoy na babed bi verniyazpers kirêşt rojdemê meclîs.
DÎHA/NAVENDÊ XEBERAN