DENÎZ ÎKE / ERDEXAN/ANF
Bi nameyê Gulsen Dalpolata ke dayîka 4 domanan a, faelîyetanê xo yê KJA ver 20 rojî verê ameybî tewqîfkerdiş. Nika zî mêrdeyê Gulsene Nurbay Dalpolat zî bi îdîaya ‘heqaretê Serekkomarî kerdo’ cezaya ci ame tesdîqkerdiş û o zî do bikewo zîndan. Eke wina bibo, 4 domanî do orte de bimanî.
Yeno zanayîş ke dayîke Gulsen Dalpolate çarçewaya tehqîqato ke hetê Serdozgerîya Komare ya Erdexanî ra yeno meşnayîş de ameybî tepiştiş û badê ke 13 rojan tepişte mende, ameye tewqîfkerdiş û erşawîyaye Zîndanê Bayburtî.
Mêrdeyê Gulsene Nurbay Dalpolatî dîyar kerd ke ‘Gulşene netîceyê suc hesibîyayîşê tokayêka keske-sûre û zerd, atqîya Selahattîn Demîrtaşî û 3 rojnameyê Ozgurlukçu Demokrasî ameye tepiştiş’ û wina dewam kerd: “Hakimî derheqê dayîka 4 domanan de îdîa kerd ke îxtîmalê remayîşî gore qerarê tewqîfbîyayîşî da.”
Heto bîn ra Nurbay Dalpolat zî 26ê temmuze de amebî tepiştiş, hetê mehkeme ra 1 serre 5 aşme û 15 rojî ceza dîyabî ci. Cezaya Dalpolatî hetê Yargitayî ra ameye tesdîqkerdiş û Dalpolat do bikewo zîndan. Lajê Nurbayî yo 7 serreyî zî vano qey dayîka ci nêweşxane de ya.