Na nustîsê xo de wazen hebê kar û gurê xo yê serranê peyanan sero qalbikerî. Mi se kerd û sene tecrubeyî kerdî?
Verecoy vajîne, ma gunade girse kerde. Mi bi Eren Kiliç ra guna henene kerde ke, qe mevazê! Ma seweta zonê xo kitavî vetî.
Wastena ma na biye ke, zonê ma wo ke roy verde ro, cila merdene dero, dezunê ci hebê senik kerîme.
Verecoy vajîne: Ma quranê nênusnê, no jû verniyaz bî.
Ma vat belka dezê zonê ma hebê benê senik, însanê ma qeke nê nî verniyazan sero nanê hurê, verniyazanê xo kenê û niya raştiye zî vejîna werte.
Hama hen nêbî. Ma de rexne çîno, mehkeme kerdene esta. Ceza dayene esta.
Qaruxenî, çimşayenî û gosehîrayenî vejayî ver.
Bi raya înternet 3-4 mordeman marê mail rusna, verniyazê xo kerdî û kemiya ma wa ke kitavan de biya, hayr ont aye ser. Wes û war bê!
Tayîne ez jê çerçî dîne, vat no peru qezenc keno. Keşkena qezenc bikerî, no derd mi nêweno.
Reye niyadê, sona jû numayîs, mîtîng. En senik 5 hezar mordemî tewrê mîtîngî biye û ti uza 20 kitavu rosena.
5 hezar mordeman ra 20 mordemî kitav cenê, dilo heylo!
Na wa peru qezenc kerdene? Perunê raye bîle cevê xora dana ke, nî 20 kitavî biresê însanan.
Jede kes kulturê xorê wayîr nêvejîno, heştîrê zafîne zur yê.
Ala reye niyadê, jû xanime yena masa to. Kitavude niyadana vana ‘ez her çî zonen, nî mirê kitavî lazim niyê. Dima pelga virene yê alfaba kena ra, cerebnena ke biwano, besenêkena. Pers kena vana ‘no çiko, no yeno çi mane?’ Cirê ken zelal, riyê xo nêdezeno, terknena sona. Numayîso de bînde onca yena û onca hen qesey kena.
No jû numune bî, çiyê niyanenî zaf ameyî sarê mi ser.
Mayê yena, domonê xoyo ke kitavande niyadano beno sa, kuna dest ra cena bena jê heliyê çole. Cira pers nêkena û cirê kitavu nêcena.
Jû mordemek yeno masa to, kitav de niyadano vano, ‘ma de ney ra nêvane vorek, vanê beran, zonê mi yê tora ‘sağlem o’ remeno sono.
Însanî yenê masa to, kitavan de niyadana vanê, ‘vanê ma de naye ra lolike nêvanê, vanê tamates’ terknenê sonê.
Firsed mordemî nêdanê ke cirê zelal kerê û vazê zonê ma de, çiyoke ez zonen 6 namê lolike estê. 
Jû mordemek yeno masa to vano, ‘ti zonê ma de taye çî vana ez famnêken, nî çî zonê ma de çînê, mi ma û piyê xora nêhesnê.’
Ti pers kena vana, ‘de ala reye vaze, zonê ma de ‘Bîrleşmiş Milletler’ çiko?’ riyê xo çarneno bêveng û bêvaz sono. Mi çiye famkerd. Leto jede însanê ma bi zonayîs ya zî bê zonayîs kulturê xorê dismenenî kenê. Rakerde niyê, ma û piyê xo kenê mane, zonê xo hîra nêkenê.
Siyaset zî qe pers mekerê. Jû sevda tirkî ya gureta sono.