Lajê vilakarê rojnameyê Kadrî Bagduyo ke amebi qetil kerdene Ferhat Bagduyî derheqê kişîyayîşê pîyê xo de dîyar kerd ke qatilî vanî ‘seba ke rojnameyê kurdî vila kerdêne, ma kişt’ labelê nînî tepiştene û wina va: “No zî yeno manaya ke ê pîya xebetîyenî. Mesela hende aşkere ya.”

 

HAMDULLAH KESEN / MA / EDENE

Vilakarê rojnameyê Azadîya Welatî Kadrî Bagdu 14ê teşrîna verêna 2014î de wexto ke bi pisqileta xo rojname vila kerdêne, amebi qetil kerdene. Dima ra endamê DAIŞî Servet Koçî ser medyaya komelkî ra derheqê qetlîyamî de melumatî daybî lajê Bagduyî Ferhat Bagduyî û îtîraf kerdbî ke înan bi xo pîyê Bagduyî qetil kerdo.

Ferhat Bagduyî dîyar kerd ke Koç û DAIŞîyê bînî taxe de esnafî kerdêne û wina domna: “Nêyî hertim şîyêne Kobanê û ameyêne. Hetta çend reyî birîndar bîbî. Ma hertim yewbînan dîyêne. Mabênê ma de problem çinêbi, xora ma taxe de zaf ameyêne heskerdene. Nînan hedîseyanê 6 û 8ê teşrîna verêne de keyeyê xo taxe ra kiriştî.”

   

Bagduyî dîyar kerd ke dima ra Koç ser medyaya komelkî ra ey reyde qisey kerdo û heme çî îtîraf kerdo. Bagduyî vatişê Koçî wina neqil kerd: “Ma pîyê to kişt. Ma hedîseyanê Kobanê de sey tîmêkî şuxilîyayêne. O wext ma şî Gulbahçe û ma do awanîya DBPyî ser o gule bireşenayêne. Labelê ma Kîremîthane de Ahmet Albay kişt, Kuçukdîkîlî de 2 kesî birîndar kerd. Mi bi xo Yusuf Gulderen kişt. O wext polîsî ameyî, ewnîyayî ke ma yî, reyna şîyî. Seba ke rojnameyê kurdî vila kerdêne, ma pîyê to kişt. Ma seba ke heyfê Yasîn Boruyî bigîrî û Tirkîya de çalakîyêka tesîrine bikerî, pîyê to hedef girewt.”

50 kesî hedefê înan de bî

Bagduyî da zanayene ke goreyê vatişê Koçî, lîsteyêka ke mîyanê ci de nameyê 50 kesî estbî, ameya amadekerdene û wina va: “Tena pîyê mi nê, datê mi Temel Bagdu, waya mi Mizgîne û nameyê mi zî aye lîste de estbîyo. Înan nameyê heme kesê ke dezge, komel û partîye de xebatîyayênê, nameyê înan lîste de nuştî. Goreyê vatişê Koçî, heme çî hetê bi nameyê Murat Bulanikî de kesêkî ra ameyêne organîzekerdene. Hetta no kes nika AKP reyde xebetîyeno. Nînan o wext planê xeylê çalakîyan kerdî.”

Her ke ma cigêrayîş kerd, zextî zêdeyayî 

Bagduyî wina qedêna: “Ez û avûkatê xo ma heme dîmenî dayî dozgerîye. Xora înan verê cû telefonê mi goşdarî kerdo. Seba ke mi nê dîmenî dayî înan, ez 8 reyî ameya tepiştene û 5 aşmî zîndan de menda. Dima ra mi berat kerd. Seba ke ma na mesele ser o vindetî, ez û avûkatê mi ma zaf zextî dîyî. Avûkatê mi çend reyî ame tepiştene û ame derb kerdene. Her ke ma cigêrayîşî kerdî, înan ma girewt, labelê dest nêdayî qatilan. No zî yeno manaya ê pîya xebetîyenî. Ê eşkenî endamê MÎTî ke qetlîyamê Reyhanli viraşto, Lazkîye ra bitepişî û bêrî. Labelê na mesele de gamêk zî nêerzenî. Mesele hende aşkere ya.”

Çira gaman nêerzenî?

Avûkatê doze Tugay Bekî zî va ‘melumatê Koçî de heme çî bi hawayo aşkere ameyo vatene’ û wina domna: “Koçî heme çî îtîraf kerdo û nameyê kerdoxan dayo. Ganî 3 cînayetî (Kadrî Bagdu, Yusuf Gulderen, Ahmet Albay) pêro pîya bêrî erjnayene. Ma bi desan reyan muracat kerd, labelê netîce nêgirewt. Seba ke îqtîdar perspektîf dabi, nê cînayetî nînî dîyayene. Wexto ke merdim ewnîyeno, no tena tehqîqatê cînayetî nîyo, eynî wext de ganî heme dozger û hakimê ê wextî zî bêrî mehkemekerdene. Dosyaya tehqîqatî de hem delîlî zaf î û hem zî îtîrafê Koçî estî. Labelê emnîyet û dozgerî ti game nêerzenî. Ganî dozger û mudirî emnîyetî ke no het de game nêerzenî, ganî derheqê înan de tehqîqat bidîyo destpêkerdene. Çira gaman nêerzenî û nê kam î?”