Bi hezaran serra ke kurdî roşanê Newroze zey roşanê cuyayîşê neweyî, roşanê xelasîye û roşanê azadîye pîroz kenê. Bi desan serran kurdêy vakûrî pîrozkerdişê Newroze de hetê dewlete ra raşt ro kiştiş û qirkedişan ameyî.
La ancî zî înan fek pîrozkerdişê roşanê xo yê azadîye ra verra nêda. Emsar ko Newroz bi xemgînî la bi ruh û bawerîya xelasî û azadîye bêro pîrozkerdişî.
Xoverdayîşê Cizîr, Nisêbîn û Sûrî hîmê xo Newroze ra giroto û bi ruhê Newroze verdewam keno. Lazim o ke her ferdê kurdan zî bi ruhê Newroze tê bigeyrê. Lazim o ke bi ruhê Kawayî hemverê zilmê zaliman vecîyê. Bi ruhê xelasîye û azadîye tê bigêrê û yewîya xo xurt bikerê. Yewîtî xelasî û azadîya şaran de cayêke pîroz gêna. Dewletê dinya anênê pêgirotiş û yewîya şaran ra. Wexta şarêke yewîtîya xo ra fek verra bido heme awayî bindestî û dagirkerdişan rê beno a.
Muhîmîya yewîye bi qasê cuyînî ya. Wexta şarêke yewîya xo ra fek verra bido zey ke cuyînê xo ra fek verra bido.
Wexta şarêke yewîya xo ra fek verra bido war û axa xo ra verra dano. Loma dagirkerî her wext vernî de nakokî û bêtefaqî kenê mîyanê şaran. Û bi ay awayî zehf rehet ay şaran bindest gênê. Dagirkeran şer û alozîyêka gird kerdî mîyanê Rojhilatê Mîyanînî û semedoke înan bindest bikerê bêtefaqî kenê vila.
Helbet di nê şerrê bê emanî de ke zey Şerê Hîrêyine yê Dinya yeno dîtişî kaykerdişê dagirkeran şarê kurdî ser zêdetir o. Loma lazim o ke şarê kurdî ro xo biarqelyo û yewîya xo virazo. Eyro roj heme rojan, heme serran û heme wextan zêdehîrê lazimîya şarê ma bi yewîye esta.
Kurdan senîn ke pêgirotişê xo yê Kobanê dir bi heme dewletanê dinya xo da qebûlkerdişî lazim o eyro zî pêgirotişê xo yê bi Cizîr, Nisêbîn, Sûr û cayê bînan ê xoverdayîşîyî dir xoserî û azadîya xo bi heme dewletan bidê qebûlkerdişî. Her çiqas heta nika yewîya ke lazim bîya nêamîya dîyişî zî lazim o ke eyro ra tepya bi ruhê Newroze yewîya xo xurte bikerê û xoserî û azadîya xo bi heme dewletanê dagirkeran û dewletanê dinya bidê qebûlkerdişî.
Lazim o ke ma kurdî Newroza emserrî bi yewîye, tifaq û coşa xoserî pîroz bikerê û xoverdayoxanê Cizîr, Sûr û cayê bînan ê xoverdayoxan rê dîyarî bikerê. Bi hêvîya ke ma bi rihê yewîye û xoserî pîroz bikerê.
Roşanê Newroze yê heme şarê ma pîroz bo.
Nesrîn NAVDAR