Bi piştîdayîşê Konfederasyonê Sendîkaya Kedkaranê Rayapêroyî (KESK), Konfederasyonê Sendîkaya Karkeranê Şorişgêrî (DÎSK), Yewîya Odeyê Muhendis û Mîmaranê Tirkî (TMMOB) û Yewîya Tabîbanê Tirkî (TTB) kampanyaya ‘Ma OHAL nê, demokrasî wazenê’ dîyabî destpêkerdiş.
Komeleyê sîvîlî kampanya dayî destpêkerdiş û do 2ê kanûne de Anqara û 17ê kanûne de zî do Stenbol de şahîyêka girde bêra viraştiş. Badê nê cayan do Îzmîr de zî şahî bêra organîzekerdiş û do kombîyayîşê girdî bêrî viraştiş. Komeleyê karkeran seba wedarnayîşê OHALî veng dayî herkesî û heme partîyan û dîyar kerdî ke tena prosesêko sey referandumî eşkeno OHALî wedarno.
Babete ser o Sekretera Pêroyî ya DÎSKî Arzu Çerkezogluye, Sekretera Pêroyî ya TMMOBî Dersim Gule, Sekreterê Odeyê Doktoran yê Stenbolî Samet Menguç û Endamê KESKî Îlhan Yîgîtî qisey kerdî.
Çerkezogluye qiseykerdişê xo de wina va: “Ma 81 bajaran de xebatê kampanyaye bica anî. Seba demokrasî ma do keye bi keye bigêrî û qala kampanyaye bikerî. Ma veng danê heme kedkar û karkeran ke wa wayîrê keda xo bivejyî. Cayêko tede demokrasî çinêbo, ewja de heqê kede çin o. Demokrasî nanê karkeran o. No semed ra ma veng danê herkesî ke wa seba demokrasî têkoşîn bidî.”
Gule zî wina va: “Kesê ke OHAL nêwazenê, ganî pîya hereket bikerî û têkoşîn bidî. Seba wedarnayîşê OHALî çalakîyê tewir bi tewir yenê amadekerdiş. Ma do taxan de bibî.”
Wa herkes pîya hereket bikero
Menguçî dîyar kerd ke OHAL de bajarê kurdan rijnayî û wina va: “Her cayê Tirkîya de rijnayîş yeno kerdiş. OHAL zirar dano weşîya merdiman. Ganî heme doktor û kesê ke demokrasî wazenê sere wedarnî û pîya têkoşîn bidî.”
Yigîtî zî qala tesîrê OHALî kerd û wina domna: “Tewr zêde karkerî OHALî ra tesîr benî. Heta niha 4 hezar û 99 endamê ma bi KHKyî kar ra ameyî îxraçkerdiş. Seba wedarnayişê OHALî çi destê ma ra bêro ma do bikerî.”
MA/STENBOL