La şarê kurdî bi sebir bê veng mend û va wa ravêreyîya çareserî zirar nêvîno. AKPî bi dewleta xo ya dagirkere wa qestê çinêkerdişê xozaya welatê ma kerd û bi bendawan û qaleqolan mexsedê xo yê derheqê xozaya ma û şarê ma de moşt ra, la ma ancî bertekê xo tenê bi awayêke demokratîke moşt ra û AKPî ancî bi kiştiş verepersê ma da. 

Ma bi israr va çîyo ke bi demokrasî çareser nêbo çinîyo û ma bi rayîrê weçînayîşî gama sîyasetî eşte la ey de zî AKPî verepersê şarê ma bi qirkerdiş da û bi awayêke qeleşî û teberê merdimahî bombeyî şarê ma yê sivîlî de teqnayî. 

La ancî ma va wa ravêreyîya çareserî zirar nêvîno û ma bi sebirêko pîl bêveng mendî. Bi viraştişê bendawan kulê ey hal nêbi agir eşt birranê (daristanan) ma û ma bi derfetanê xo tefêna. 

La AKP û dewlete ey bi israr waşt ravêreyîya çareserî xira bibo û verê xo da ciwananê ma û Pirsûs de bi desan ciwanê ma qetil kerdî. 

Ancî ma sebir kerd. Û peynîya peynî bi îdîaya ke di hebî polêsê înan ameyê kiştişî, AKP û dewleta ey şirîk û hemparê xo (yew ti ra Barzanî yo) dayî kişta xo, verê xo da Heremanê Medya û qestê qirkerdişê ewladanê şarê kurdî ke temînatê estbîyayîşê înanê kerd. 

Eyro dijminê şarê kurdî anênê zerrey çimanê înan ra û vanê ma ko ewladanê şima qir bikerê. La çi heyf ke şarê kurdî ancî bê veng mendî. 

Eyro çend rocî yo dewleta AKPî nêverdena cenezayê 13 hebî ewladanê ma yê ke Rojawan de şehîd bîyê bideyo malbatanê înan û ma bêveng ê! 

Ey Çîn ra heta etya ameyî ti welatêke înan nêhewênayî û ameyî welatê ma de bî wayîrê welat û dewlete û eyro nêverdenê ma ewladanê xo yê şehîdan şaristan û dewanê welatê xo de bidê erd. 

Ma welatêke bexşê înan kerd, ey ma rê gorêke zêde vînenê. Lazim o şarê kurdî qebûl bikero ke alerjîya dagirker û dîktatoran demokrasî, aştî û yewbînîya şaran rê esta û ey heme xozaye înan rê tersê. 

Eger şarê kurdî wazeno nê dîktatorê zaliman ra feletîyê lazim o yewîtîya xo virazê. Ma zanê ke şarê kurdî hem biaqil, hem zî eftaraye(jêhatî) yê. Kêmasîya înan a tewr pîle çinêbîyayîşê yewbînîya înan o.

 Eger şarê kurdî yewîtîya xo virazo ko azadîya Rayberê xo zî bivîno, ko ziwanê xo zî asîmîlasyon ra feletno, ko şaristan û dewanê xo de bibo wayîrê rayveberî û hêzanê xo yê ewlehî zî. Lazim o ke şarê kurdî etya ra tepya îxanetî mîyanê xo de qebûl nêkero û ayê ke îxanet ro yewîtîya şarê kurdî bikero lazimo ke şarê ma bieşko cezayê giranan bido înan. 

Ez dibare vana dermanê dagirker û dîktatoran ra xilasnayîş û azadîya şarê kurdî yewîtîya înan ra derbas bena.


Nesrîn NAVDAR