6ê Gulane serrgêra îdambîyayîşê şorişgêr Denîz Gezmîş, Huseyîn Înan û Yûsûf Aslanî yo. Komîteya Îdarekare ya PKKyî derheqê serrgêra îdambîyayîşê 3 şorişgêran de eşkerayîyêka nuştekîye weşanaye.
Komîte eşkerayî de vato ‘47 serrî serê îdambîyayîşê înan ra ravêrt’ û wina dewam kerd: “Serrgêra îdambîyayîşê înan de ma nê her hîrê serkêşanê ciwananê Tirkîya û Kurdistanî û yê şaran bi vîr anê û ma sozê bicaardişê vîrameyîşê înan bi hemleya ‘Ma tecrîdî bişiknê, faşîzmî birijnê û Kurdistanî azad bikerê’ danê.”
Komîte eşkerayîya xo wina domnaya: “Yewîya Rayber Abdullah Ocalanî, Hakî Karer û Kemal Pîrî yê mîyanê refanê PKKyî bi bingeyê şorişgêrîye dewam kerde. Qîrayîşê Denîz, Yûsûf û Huseyînî yê gama îdambîyayîşî de ke vatêne ‘Wa biciwîyo yewîya şaranê Tirkîya û Kurdistanî û mucadeleyê înan’ nê esasî ser o bica amî. Nika zî yewîye û mucadeleyo hempar ê şar û şorişgêranê Tirkîya û Kurdistanî yê mîyanê refanê HBDHyî paştîya xo danê tecrubeyêkê winayênî. Mucadeleyê ‘Tirkîyeya demokratîke û Kurdistano azad’ ê hemverê faşîzmê AKP-MHPyî nê esasî ser o bica yeno, do hîna pîl bibo û bireso serfirazîya tarîxîye.”
Şorişgêrê bînî zî ameyî yadkerdene
Komîte eşkerayîya xo şorişgêranê bînan zî yad kerdo û eşkerayî wina qedîyaya: “Heman wextî de ma hemra Şîrîn Elemhûlî û 4 hemrayanê ke 9ê Gulana 2009î de hetê Îranî ra ameyî îdamkerdene, Hozan Mizgîne (Gûrbet Aydin) ya ke 11ê Gulana 1992î de Tetwan de şehîd bîye û serkêşê DKPyî Ûlaş Bayraktaroglû yo ke 9ê Gulana 2017î de Reqa de, şerê hemverê DAÎŞî de şehîd bi, bi hurmet bi vîr anê. Ma bi eşkerayî vanê ke nê hemrayê ma do hemleya xoverdayîşî ya ‘Ma tecrîdî bişiknê û faşîzmî birijnê’ de biciwîyê û ma do amacanê înan bica bîyarê.”
ANF / BEHDÎNAN