Avûkat Mahmut Şakarî qerarê Dîvanê Edaletî yê Ewropa ser o va ‘qerarê Dîvanî seba Amerîka zî cewabêk o’ û wina domna: “Bi nê qerarî çekûyê ‘teror’ û ‘lîsteya terorî’ bi nê qerarî derbê girdî werdî. Goreyê mi huqûqî rolê xo ard ca, êdî ganî dînamîkê polîtîkî bikewî dewre.”

 

SADÎYE ESER MA / STENBOL

‘Lîsteya Rêxistinanê Terorî’ ke 6 aşman de reyêk hetê Konseyê Ewropa ra yena newekerdene ser o Dîvanê Edaletî yê Ewropa çend rojî verê qerarêk girewt. Seke yeno zanayene 2014 de endamê Konseyê Caardişî yê PKKyî Murat Karayilan û Duran Kalkanî muracat kerdbî. Qerar ame dayene ke argumanê ke mabênê 2014 û 2017î de girîyayî lîsteya terorî kêmî yî û ti bingeyê înanê huqûqî çin o.

Babete ser o avûkat Mahmût Şakarî qisey kerd. Şakarî dîyar kerd ke PKK ewil 2ê gulana 2002î de girîya ‘Lîsteya Terorî’ û wina va: “O tarîx ra nata lîste her 6 aşman de reyêk ameya newekerdene û PKK zî daxilê lîste ameyo kerdene. 10ê sibata 2014î de vera lîste de doze ameye akerdene. Dima ra Konseyê Ewropa aşkere kerd ke PKK 4 argumanan ser o girîyayo lîste. Labelê Dîvanî nê 4 argumanî zî kêmî dîyî. Cok ra ti bingeyê huqûqî yê nê qerarî zî nêmendo. Goreyê mi do netîceyê cîddî yê sîyasî yê nê qerarî bibî. Goreyê mi lîsteya terorî hetê PKKyî ra veng vejîyaya.”

Şakarî va ‘beno ke Konseyê Ewropa seba îtîrazî muracat bikero. Eke muracat bikero, proses do dewam bikero. Labelê eke muracat nêkero, o wext qerar bena tesilî. Ronîyayîşê lîste û daxilkerdişê PKKyî helbet qerarêko sîyasî yo. Çimkî PKK wexto ke pêrodayîşî çin bîyî û xo antbî teberê sînoran, girîya lîste. Dînamîkê ke ser nameyê kurdan sîyaset kenî, eşkenî nê qerarî ser ro zaf çîyan bikerî. Cayê mehkeme dewletanê Ewropa mîyan de muhîm o û mehkemeye bi nê qerarî heme mehneyanê Konseyê Ewropa  betal kerdî. Eke Konseyê Ewropa reyna PKK bigîro mîyanê lîsteya terorî, o wext ganî sebebanê neweyan nîşan bido. Goreyê mi huqûqî rolê xo ard ca, êdî ganî dînamîkê polîtîkî bikewî dewre.”

   

Hetê kurdan de ti hukmê xo çin o

Şakarî qiseykerdişê xo de qala qeraro ke Amerîkaye derheqê 3 îdarekaranê PKKyî de girewto kerd û wina va: “Qerarê Amerîka şerm o. Qerarêko winasî hetê kurdan de ti hukmê xo çin o û nîno qebulkerdene. Goreyê mi qerarê Dîvanî seba Amerîka zî cewabêk o. Çimkî Murat Karayilan û Duran Kalkan eynî wextî de yê ke muracatê Dîvanî kerdbî yî. Qerarê Amerîka dewamê komplo yo. Çimkî Komploya Mîyanneteweyî bi rayberîya Amerîka de amebî viraştene.”

Ganî ma her ca de nê vatişan red bikerî

Şakarî peynîya qiseykerdişê xo de wina va: “Tena hetê huqûqî nê, hetê polîtîk, dîplomatîk, psîkolojîk û sewbîna hetê nê qerarî zî estî. Goreyê mi çekûyê ‘teror’ û ‘lîsteya terorî’ bi nê qerarî derbê girdî werdî. Xora nê çekûyî bîyî sebeb ke merdimî xo tay pey de bigîrî. Ma eşkenî nika ra pey her hetê cuye de bipawî ke vatişê ‘teror’î huqûqî nîyo. Ganî ma her ca de vatişê ke ‘teror’î ser o yenî vatene red bikerî. Qerarê Amerîka zî daxilê nêyî yo.”