Artêşa Tirkî ke bi teyare, tanq, top, sîlehanê giranan û çeteyanê xo 4 rojî yo ke hêrişê Vakur û Rojhelatê Sûrîye kena. Vera hêrişê dagîrkerîye yê dewleta Tirkî de hêzê QSDyî xoverdayîşêko tarîxî nîşan danî.
Artêşa Tirkî ewil bi teyarayan cayanê sîvîlan bombe kerd û dima ra hewl da ke bejahî ra biekewo. Labelê QSDyî derbê girdî dayî artêşa Tirkî ro. Vera artêşa Tirkî û çeteyanê ci yê ke hewl danî Serêkanîyê bigirê de şervananê QSDyî vizêr şan hîrê hetan ra çalakîyî viraştî û netîceyê ci de tewr tay 25 çeteyî ameyî kiştene û bi desan çeteyî zî birîndar bîyî.
Vera dagîrkeranê ke waşt bajarekê Til Xelefê rojawanê bajarî dagîr bikerî de, şervanî hîrê baskan ra çalakîyî viraştî û derbêka girane daye çeteyan ro. Merkezê Til Xelefî kontrolê şervananê QSDyî de yo. Dagîrkeran waşt di baskan ra, Serêkanîyê-Til Xelefî û Til Xelef-Til Erqume ra dormeyê bajarekî bigêrê. Herême de pêrodayîşê şîddetinî qewimîyenî û heta nika tewr tay 19 çeteyî kişîyayî.
Rojhelatê Serêkanîyê de çeteyanê ke herêmanê dewêka Miçî û Pîşesazîye de waşt ver bi başûrî şêrê û rayîrê Serêkanîyê-Dirbêsîye bibirnê û bi nê hewayî dormeyê bajarî bigirê, vizêr şanî derbeyê giranî werdî. Herêma Pîşesazîye de netîceyê pêrodayîşan de tewr tay 16 dagîrkerî ameyî kiştene. Çeteyan seba ke dormeyê Serêkanîyê bigirê başûrê bajarî ra hucreyê xo yê kehanî eştî têgêrayîşî mîyan. Hucreyê çeteyan mabênê dormegirewtişê şervananê QSDyî de mendî. Serê rayîrê Serêkanîyê-Hesekê de 4 çeteyî ameyî kiştene û 5 çeteyî zî ameyî tepiştene.
Planê înan dagîrkerdiş o
Dagîrkerê ke wazenê dormeyê Serêkanîyê bigirê, wazenî rojhelat û rojawanî ra ver bi başûrî raste rast şêrê. Heman wextî de dagîrkerî hewl danê Girê Sipî de rojhelat û rojawan de vila bibê û bi nê hewayî bajaran bigirî. Gama dîyine de zî plan kenê ke wareyê 120 kîlometreyî ra mabênê Serêkanîyê û Girê Sipî dagîr bikerê.
SERÊKANÎYÊ