Hemserekê Şaredarîya Bajarê Girdî ya Amedî Selçûk Mizrakli 19ê Tebaxe de wezîfe ra amebi girewtene û herinda ci de Walîyê Amedî Hasan Basrî Guzeloglu sey qayûmî amebi tayînkerdene. Cadeyê Lîse yê Yenîşehîrî de vernîya şaredarîye de 19ê Tebaxe ra nata çalakîya Nobeta Demokrasî yena viraştene.
Her roje bi seyan çalakgêrî beşdarê çalakîye benî û xespbîyayîşê şaredarî û tayînbîyayîşê qayûman de çalakîyê protestoyî yenî viraştene. Roja 48. ya çalakîye de Mizrakliyî ajansê Mezopotamya ra Fethî Balamanî rê qisey kerd.
Mizrakliyî qiseykerdişê xo de da zanayene ke ê donemo ke erjê huqûq û demokrasî ameyî texrîbkerdene ra derbaz benî û înanê ke qerarê qayûmî girewto hewl danî kerdişanê teberê demokrasî mende bikerî. Mizrakliyî dîyar kerd seba ke qayûmî ser o kontrolêk çin o, do reyna talan bêro kerdene û wina va: “Gelo 48 rojî yo kamî rîyê qayûmî dîyo? Eke cayêk de îradeya şarî çinêbo, şima se bikerî zî çîyêko bîyaye nêvejîyeno werte. Yanî şima burokrat û teknokratanê tewr baş yê dinya bîyarî zî nîna aye mana ke şima karêko baş kerdo.”
Heta ke xoverdayîş nêbo derbaz nêbeno
Mizrakliyî dewamê qiseykerdişê xo de bale ante xoverdayîşo ke 48 rojî yo dewam keno ser û wina va: “Tirkîya zere û teber de xeylê probleman de têrî ya û krîzêko cîddî esto. Seba derbazkerdişê nê krîzî ganî problemê Kurdan bêro çareserkerdene. Eke ma xover bidî, ma qezenç kenî. Heta ke xoverdayîş nêbo, muxalefet bi hawayo xurt rêxistine nêbo, ma nêşênî nê prosesî derbas bikerî. Sîstemê ewroyî ters, etirîyayîş û sewbîna ser o xo awan keno. Dermanê nêyî xoverdayîş o. Ganî ma etirîyayîşan wedarnî û hêvî gird bikerî. Nê şarî xeylê çîyê winasîyî dîyî û derbaz kerdî. No şar do faşîzmî zî derbaz bikero.”
AMED