Çalakîya roniştişî ya ke seba piştîdayîşê grevê vêşanîye yê ke vera tecrîdê serê Rayberê Şarê Kurdî Abdullah Ocalanî de yenê viraştene, hetê Partîya Şaran a Demokratîke ya Dêrsimî ra ameye destpêkerdene, dewam kerde.
Parlamenterê Çewlîgî Erdal Aydemîr, hemserek û îdarekarê partîye yê bajarî, temsîlkarê partîyanê sîyasîyan û rêxistinanê sivîlan ê cimatî û wendekarê unîversîte tewrê çalakîye bîyî. Çalakwanan tîşortê Leyla Guvene dayê xo ra û bi laçiganê sipîyan bale ante xoverdayîşê grevê vêşanîye û hêrişê serê Dayîkanê Aşitîye.
Hemserekê HDPyî yê Dêrsimî Hidir Çîçekî da zanayene ke seba ke çar kesan Dêrsim de pankarta ke ser o ‘Veng bidê cuye wa tecrîd wedarîyo‘ nuştêne tepişto, derheqê înan de tehqîqat ameyo destpêkerdene û wina va: “Seba ma cuya merdimî muhîm a. Ma tîya de yenê têhet ke wa grevî biqedyî. No zî heqê ma yo demokratîk o. La seba yewe pankarte tehqîqat yeno destpêkerdene. Na nêheqîye ya. Ma naye raşt nêvînenê. Heta ke grevê vêşanîye dewam bikerê, ma zî do çalakîya xo bidomnî.”
Parlamenterê HDPyî yê Çewlîgî Erdal Aydemîrî zî grevê vêşanîye û rojeyê mergî vist vîrî û wina va: “Semedê vernîgirewtişê mergan ganî tecrîd bêro wedartene. Ganî cade waştişê xoverdayoxan bêro bicaardene.” Qiseykerdişan ra dima çalakîya roniştişî bi çepikan qedîyaye.
PÎRHA / DÊRSIM