GULISTAN AZAK JINNEWS / DÊRSIM
Demêko derg o Dêrsim de şewatê daristanan kêmî nêbeno. Bitaybetî wextê operasyonê leşkerî de adir erzîyeno daristanan û destûr nêdîyeno welatîyî şêrî şewatan bimirênî. Cok ra şewatî her ke şono hîra benî û heta nika bi hezaran dolim daristanî veşayî.
Babete ser o welatîyî qisey kerdî û vera polîtîkayanê hukmatî de reaksîyon nîşan dayî. Cinîyan ra Xezal Dogane va ‘şewat hetê leşkeran ra ameyo dest pêkerdene’ û wina domnaye: “Leşkeran bi helîkopteran bombe eştî daristanî mîyan. Mi û heme dewijî bi çimê xo dî. Hukmat hesaban ra zozankarî teşwîq keno. Gelo seba ke ma ewja de biveşnî, teşwîq kenî? Şima çira ma ser o bombe varnenî? Şima ma ra çi wazenî?”
Gulperî Dogane zî dîyar kerde ke ma feqîr î û ma rê berê karî padaye yî û wina va: “Merdimê ma ke şewatan ver vera xo dayî bajaran zî feqîr î. Yê ke koç kerdî, eke biwazî biagêrî keyeyêko tede bimanî, çin o. Heme ameyî bombe kerdene û rijnayene. Senî ke serranê 90î de ma veşnayî, ewro zî wazenî ma biveşnî. Dewlete şewatî înkar kenî? Wazenî herême bêmerdim bikerî û na herême sey herêma pêrodayîşî nîşan bidî. Labelê çîyêko winasî çin o. Hewl danî ma bitersnî û ma dewanê ma ra bivejî.
‘Mezelê ma zî veşayî’
Bîrsen Yildize zî wina va: “Herême bi hawayo qestî bi helîkopteran yena veşnayene. Nê erdan ser o bi serran o cuye esta. Keye, doman û mezelê ma estî. Bi serran o hêrişê ma kenî. 38 û 90î de dewe û daristanê ma ameyî veşnayene û rijnayene. Ma ra vanî ‘yan bimirê yan şêrê’. Mezelanê ma bombe kerdî û veşnayî. Ê daristanan mîyan de mezelê ma estbî. Ê do senî hesabê ci bidî. Gelo domanî do mezelanê xo nêgêrî?”