Şewa verî gerîlayan eştî noqteya qontrol ê polîsan ser. Netîceyê na çalekî de polîseke merd, 2ê ci giron 4 polîsî bî dirbetin. Peycoy xêlê wesayîtê zirxî kextî taxan û geyrayişî viraştî. Badê pirodayiş sûk de hereketîna helîkopteran zî dewam kerd.
Operasyonê qirkerdena sîyasî
Badê pirodayişan quwetanê dewlet taxa Sihenk de eştî keyeyan ser. Netîceyê sereştişî de Azayê MP yê HDP Alî Ekber Kaya, Mûxabîra ETHA Ezgî Ozer ra pîya 12 kesî girotîyayî bin çiman. Welatijê bînî ke amey binçimkerden azayê ESP û SGDF yê. Quwetanê dewlet ke eştî keyeyan ser çêberê keyeyan şikitî, çîyê keye kerdî têtewr. Zerê çêyeyan de şopê gonî amey dîyayen. Mûxabîra ETHA Ozer badê wextekê serbest veradîya.
Rayirî trafikî ra girotî
Heto bîn ra rîwalo ke gerîlayan dola Pîlemûrîye girotî bin qontrola xo walitî raya Dersim û Erzîngan girot.
Walitî aşkere kerd ke rîwalo ke jû komekê 8-10 kesan qontrolê kamîya ray kena hu propagandayê rêxistin kena raya Dersim-Erzîngan trafikî rê amê giroten. Herzewbîn walitî da zonayen ke 2 wesayîtê FEDAŞ û 4 wesayîtê Îdareyê Taybet yê sûk amey veşnayen û peycoy herem de operasyon ameyo destcikerden.
Heto bîn ra binçimgirewtişê 12 kesan Edena de ame protesto kerden.
DÎHA/DERSIM