Dersim de 16ê Mijdare de hemşaredarê sûk Nûrhayat Altûn û Mehmet Alî Bûlî ra pîya 12 kesî amey binçim girewtiş û dima ra tepêşîyay. Dima ra şaredara verî yê Dersim Edîbe Şahîn kî amê tepiştiş. Hurendîya Altûn û Bûlî de yardimkarê walîyê sûk Olgun Oner zey qeyûm tayîn bi. Sûk de dûştê tayînkerdişê Onerî nêrazîbîyayenê Dersimijan ramenê. Vizêr kî nûmayişeke protestoyî virazîya.
Qeyûmî gureyê meclîsê şaredarî vinderna
Parlementerê sûk Alîcan Onlu, Serokê Pilûr Mehmet Fatîh Maçoglû, Serokê Şaredarîya Mêzgir Tekîn Turker ra pîya bi desan kesê ke Kuçeyê Sanatî de are bî hemverê Erdogan û AKP de sloganî kerdî berz.
Serokê BES Davut Balikçi ke nûmayiş de qisey kerd aşkere kerd ke bingeyê hiqûqî yê tepiştişê 13 kesan çîno. Dima ra bi çepikan heta vernîya bana Keyeyê Mamosteyan rayşîyayişeke virazîya. Yardimkarê Hemşaredaranê sûk Huseyîn Tûnç ke na ca de qisey kerd da zonayen ke qeyûmî gureyê meclîsê şaredarî vindernayo.
‘Toximî bî vila’
Serokê Şaredarîya Mêzgir Tekîn Turkerî zî hayr ant hêrişan ser û va, ‘Şima êşkenê jû gule cikerê, la nî gulan toximê xo rewna ra vilayê hardî kerd.’ Turkerî aşkere kerd ke zey ronişteyê Mêzgir îye enê kerdenan qebûl nêkenê û waşt ke hemşaredarî desince serbest veradîye. Serokê Pilûr Mehmet Fatîh Maçoglû zî ard zon ke ti eleqeyê hiqûqî yhe qewimyayişan çîno û paştîdayişê şarê Pilûr ard zon.
Qiseyan ra dima şêligî dest ci nûmayişê roniştişî kerd. Polîsan waşt nûmayişî bianco qemera. Welatijan nayî rê nêrazîbîyen damûsna. Dima ra parlementer Alîcan Onlu nêrazîbîyen damûsna û polîsan qemerayê xo girotî û nûmayiş dewam kerd.
Roja çarşem (16ê Mijdare) de Altûn û Bûlî ra pîya Azaya Meclîsê Şaredarî Cemîle Ataş, Hemseroka Şûbeyê DÎSKî yê Dersim Şukran Yilmaz, Hemserokê DBP yê sûk Mûrat Polat, Hemserokê HDP yê sûk Aslan Çag, Azayê MP yê HDP Alî Ekber Kaya, îdarekarê HDP Huseyîn Dagdevîren û Yaşar Agin, Serokê EMEP yê sûkMûstafa Taşkale, Temsîlkarê BES yê Dersim Mûsa Kiliç, û Hakan Kavût ke girotîyay bin çiman, dima ra tepêşîyay.
DERSIM