Dûştê tecrîdê ser Rayverê Şarê Kurd Abdullah Ocalanî nêrazîbîyenî her ke şinê benê vêşî. Wan, Edena, Mêrsîn, Sêrt û xêlê cayanê bîn de welatijan tecrîdî rê nêrazîbîyen damûsnay û waştî ke desinde heyetekê birişîyo Îmrali. Kişta bîn ra heyetê Îmrali yê HDP zî bi jû kombîyayişê çapemenî waştî ke tecrîd wedarîyo û veng da hikûmet ke wezîfeyê xo bîrayo ca.
Pêdîyayişê pawitoxanê Rayverê Şarê Kurd Abdullah Ocalan 27ê Tîrmeha 2011î ra na het hetê AKP yenê manîkerden. 5ê Nîsan 2015î ra na het zî şîyayişê malbat û heyetê Îmrali yenê manîkerden. No jew zî qaxûyê (guman) şarê kurdî keno vêşî. Badê hewldayena derbe ya 15ê Tîrmehî nê gumanî bî xorîn. Temsîlkarê rêxistinanê civaka sivîl û partîyanê sîyasî yê Wan veng day hikûmet ke desinde heyetekê birişo Îmrali.
Şarê kurd rewşa rayverê xo meraq kena
Azaya Kongreyê Cenîyanê Azad (KJA) Saîme Ekîncî vist vîrî ke tecrîdo ke verra Ocalanî yeno ferzkerden çare nêkerdişê meseleya kurd hewna vêşî keno xorîn û va bi hewldayena derbe ya 15ê Tîrmehî ra pîya rewş hona vêşî bi tersnek (wehîm). Ekîncî aşkere kerd ke malbat û şar rewşê rayverê xo meraq kena û wina va: “Pêdiyayişê bi Ocalanî ra xêlî çî şeno bîro vûrnayen. Ganî serva ke tecrîd biqedîyo hikûmet desinde gam bierzo.”
‘Heta ke rayver azad nêbo ma zî azad nêbenê’
Azaya Meclîsê Dayikê Haştî yê Wan Besna Aydogan zî hayr ant gumanê şarê kurd ke rojanê peynî de bi vêşî ser û aşkere kerd ke tecrîdo ke ser Rayverê Şarê Kurd de yeno ramiten ti wext nîno qebûlkerden.
Aydogan vist vîrî ke serbestîya rayverîn serbestîya pêrokîn şarê kurdî ya û qiseyê xo wina ramitî: “Heta ke rayverê ma azad nêbo ma zî azad nêbenê. Nayî ra ganî şar dûştê no tecrîdî de veng vejero.” Besna Aydogan aşkere kerd ke herbo ke jû serrîyo Kurdistan de yeno ramiten eleqeyê ci bi tecrîdî esto, heta ke tecrîd nêhewadîyo herb zî nêqedîyeno û waşt ke tecrîd desinde hewadîyo. Aydogan va, zewbîn şarê kurd do verra tecrîdî bêveng nêmano.
Bi herbê leymin tecrîdî vistî dewre
Îdarekarê Partîya Heremanê Demokratîk yê Wan Ahmet Enterlî zî da zonayen ke şarê kurd bi Rayverîna Ocalanî de destpa tekoşînê azadî kerd. Enterlî vist vîrî ke şarê kurd do dûştê tecrîdî de bêveng nêmano û veng da îxtidar ke nê polîtîkayan ra fek virado. Îdarekarê DBP Ahmet Enterlî vist vîrî ke girêka meseleya kurd encex bi wedarnayişê tecrîdî çare bena û wina va: “Ma dê dûştê no tecrîdî bêveng nêmanê. Eke zerarekê werdî bîro rayverê ma, ma pêrokînî xo feda kenê. Wa no endî wina bîro zanayiş.”
‘Şarê kurd bi asnaw şina Îmrali’
Delegeya Kongreyê Civaka Demokratîk (KCD) yê Wan Edîbe Babûr zî tecrîdê 17 serran vist vîrî û aşkere kerd ke 5 serrîyo pêdiyayinê pawitoxan bi Ocalanî bi kêfî yenê manîkerden. Babûr da zonayen ke bi no tecrîdî Tirkîye peymanê mavên netewî ke îmzeyê xo eşto çinî hesibnena û wina va: “Her qorî bi vatişê ‘kêştî xirabeya’ pêdiyayişan manî kenê. Ewro domanekê 7 serrî zî, 70 serrî zî zanê ke na jû zûrrî ya. Wa destûr bidê şarê kurd bi asnaw şina Îmrali.”
Babûr veng da sazgehanê mavên netewî ke bikewê hereket. Babûr peynî de va, ‘ma no tecrîdî qebûl nêkenê. Bi hewldayena derbe ya 15ê Tîrmeh qaxûyê ma bî vêşî. Ganî hikûmet rojek verîya rojekê wezîfeyê xo bîyaro ca. Herzewbîn nûmayişanê Edena, Mêrsîn, Sêrt û xêlê cayanê bîn de zî wazîya ke desinde pêdiyayin virazîyo û mesajê ramitişê nûmayişan ame dayen.
Kişta bîn ra heyetê Îmrali yê HDP zî bi jû kombîyayişê çapemenî hayr antî tecrîdî ser û waştî ke desinde tecrîd wedarîyo û pêdiyayin virazîyo. Heyetî veng da hikûmet ke wezîfeyê xo bîrayo ca.
DÎHA/WAN
Meydanan ca meverdê
Hemserokê KONGRA-GEL Remzî Kartal vist vîrî ke Rayverê Şarê Kurd Abdullah Ocalanî ra xeber nîna giroten û veng da şarê Bakûrê Kurdistan, metropolanê Tirkîye û Awrûpa ke zerreyê nûmayişan de bê.
Ocalan o ke 17 serrîyo bin tecrîdekê giran de yo ra 15.5 aşmîyo xeber nîna giroten. Kurdê ke welatanê Awrûpa de ciwîyenê zî serva protestokerdişê tecrîdî kampanya û nûmayişanê cîya cîya virazenê. La badê hewldayenê derbe Ocalanî ra xeber nêgirotiş kurdan vist gumanê xorînî mîyan. Hemserokê KONGRA-GEL Remzî Kartal derheqê babedî de Ajansa Xeberan yê Firatî rê qisey kerd. Kartalî arde zûne ke bi viraştişê pêdiyayînê bi Ocalanî dewleta Tirk êşkena kaosî ra bivejyo. Kartalî şarî ra zî waşt ke vera tecrîdî her ca de nûmayişan xurt bikerê.
Hurdî cepheyî dişmenê kurdan ê
Tirkiye de kaos û qrîz her ke şino beno xorî û tersê şarê kurd ê semedê weşiyê Rayverê xo Abdullah Ocalanî zêdiyeno. Hemserokê KONGRA-GEL Remzî Kartal ke ANF rê qal kerd, eleqa ûnt şertanê Ocalanî ser û waşte ke yew hel cuwaver tecrîd wedarîyo.
Remzî Kartalî hayr ant tecrîdê xorî ser û hina va: “5ê Nisana 2015î ra nat Rayver Apo ra xeber nêgerîyena. Hereketê ma, şarê kurd xora xelyek waxto rehat nîyê. Derbeya sivîl ê AKP ê 7 Hazîranî ra dima inkê zî Tirkîye de derbeya lejkerî esta. Nê wird cepheyê ke semedê îxtîdarî yew bîn wenê, têna yew wertax noqteyê înan esta; vera Rayverê Şarê Kurd û waştişanê kurdan dişmenine. Coka şarê ma ho yew tewatîr do.”
Meydanan ca meverdê
Kartalî hayr ant muhîmîya nûmayiş û tekoşîna şarî ser û veng da şarê kurd yê Bakûr, metropolanê Tirkîye û Awrûpa: “Vêrnî de Bakûr, metropolê Tirkîye, qefleyê bîn ê Kurdistan û Ewrûpa de lazimo ke şarê ma meydanan ca meverdo, nûmayişan rê dewam bikero.Pawitişê ma no yo ke şarê ma çi destê ci ra yeno ey bikero û wahar Rayverê xo bivecyo.
Adresê kaosî ra vejyayiş Îmrali yo
Hemserokê KONGRA-GEL Remzî Kartal veng da hikûmet û dewleta Tirk zî û vat; Tirkiye netîceyê polîtîkayê çare nêkerdişê meseleyê kurd kewt na kaos. Tengayî ra zî têna bi viraştişê pêdiyayîş pê Ocalanî eşkene bivecyo. Kartal arde zûne ke, eke waziyeno ke vernî Tirkiye abi, lazimo ke tewr Rayver Apo pêdiyin virazîyo û demo newe dest ci bikere.
Kartal eşkerakerdişê heyetê Îmrali zî bêhikum hesibna û vat: “Hetûn pawitox û keyeyê Ocalanî pê çimanê xo mevîne ma bawerî nêkenî. Coka gerek tecrîd ser Ocalan ca de wedariyo. Hereketê Cenîyanê Kurd yê Awrûpa (TJK-E) zî hayr ant rewşê Ocalanî ser û vist vîrî ke no rewşê nêdîyarî gumanan kenê xorîn. TJK-E zî dûştê rewşa nêdîyarî vengê nûmayişî da.
Heto bîn ra Serwekîlê Koma HDP Îdrîs Balûkenî zî derheqê babed de damûstayîn da û vist vîrî ke derheqê rewşê Ocalanî de zonayişê hikûmetî bes nêkeno. Balûkenî va, ganî desinde şirîyo Îmrali.
ALÎ GULER/ANF/BRUKSEL