Serekkomar Erdogan û hukimatê AKPe ya vîyarte weçînayîşê 7’ê hezîranî ra dima hemverê şarê kurd konsepta şerî da destpêkerdiş. Çarçiweya na konseptê şerî de daristanê heremî yenî veşnayîş, herem bêmerdim bêro veradayîş.
Babete sero Meclîsê Ekolojî ya Êlihî Semra Yîgît ard ziwan ke nêy serranê peynîyan de erdvînayîya kurdan yena talankerdiş û binê dagirkerîyê de û wina domna: “Serranê 90’î de zî daristanî ameynê veşnayîş û xoza ameynê texrîbkerdiş. Wexto ke ma roca ma eyro zî ewnênê, mezgê înan de ti bedilyayîş nêbîyo. Rayna daristanan danîy adirî ver. Labelê na ray qetilkerdişê xozayî ya tewr gird virazenîy.”
Yîgît dergeyîya qalîkerdişê xo de ciresna ke erdvînayî ti car aydey nîjadek nîyo û wina vat: “Kurdistan hem hetê çimeyanê xozaye de û hem zî hetê erdvînayî de wayîrê erdvînayîyek rind o. Labelê ti car fersenda ma ke nêy rindîyan bicuyî nêbîyo. Her tim dew, daristan û koyê ma amey veşnayîş û qedexekerdiş. Wexto ke yew erdvînayîya to ke ti bişînbî îsbat bikerî çinêbo se aye wext yeno manaya ke ti zî çinî. Hemverê veşnayîşê daristanan zerreyê ma zî veşeno.”
Yîgît wina qedîna: “Veşnayîşê daristanan raştê peynîya weçînayîşan ame û no zî çîyo ke tesadufî nîyo. Hemverê nêy qetlîaman bêvengîyek gird esto û no zî nîno qebulkerdiş. Semeda ke no bêvengî esto duştê qirkerdişan zî her ke şona hîna girdêr beno. Ez vana ke destanê xo xozaya ma ra kaş bikê.”