Bi sebebo ke sûkan de her ke şino viraştişê betonan beno zêde, cênî zî vera nayî de alternatîf ronenê. Nê cinîyan ra yewe zî Emîne Çapan a ke qezaya Amed Rezan ra girêdaye dewa Sînnetî de cuyena ya. Emîne dana zonayen ke çîyê ke a wena pêrokînî tebîî yê û vana, “Eke ez ewro tîya baxçe nêvirazî do bêrê tîya de zî bikerê beton. Dewe de cu esto.”
‘Heme çî tebîî yê’
Emîne Çapan qalîkerdişê xo de dana zonayen ke cuya dewe sey bajaran nîyo û wina vana: “Ez aşma wisarî ra sewze û fikîyanê xo ramena. Pîyaz, sîr, firîngî, balîcan, îsot û xeylê sewzî dana ro. Semedê mi aşma Nîsane aşmêk bereketî ya. Na aşma de heme çî xo keno newe, hema vaje ez zî xo kena newe. Ez tena sewze nêdana ro, ez ewnîyena daranê xo ra zî. Dara gilyazan, yê sayan, xewxe, miro û bîyokî baxçeyê mi de estê. Wexto ke ez baxçeyê xo de eleqedar bena, ez huzur vînena.”
‘Ez eşkena bi serran eleqedar bî’
Çapan tena baxçe nê, heywanan zî kena wey. Emîneya ke semedê çêlikê ordeganê xo ca viraşto û vana, “Ez senî ewnîyena domananê xo ra, ez heywenanê xo ra zî hendayî muhîmî dana“ û qiseyanê xo wina qedênena: “Heywanê mi, hak, rûn, pênîr danê mi. Ez timûtim înan kontrol kena. Ez vejêna teber qût dana ordegan û manganê xo çernena. Wexto ke ez nê çîyan kena ez xo zaf rind hîs kena. Ez bi serran o nê karî kena, ez eşkena bi serran zî dewam bikera.”
AMED