Dewê Pasûrî yê Amedî ke zimistanî zaf derg û xidar derbas benî de nika wextê amadekarîyê zimistanî yî. Dewijî seba ke zimistanî biwerî rîçale, salça, qatix û meyweyan wişk kenî. Sebze û meyweyê ke yenî wişkkerdene, erzîyenî binê erdî.
Mezraya Kipovitî de cinîyan qala amadekarîyanê zimistanî kerdî. Cinîyan ra Fehîme Bozkûrte daye zanayene ke zimistanî zaf derg û xidar derbas benî, cok ra ê hamnanan amadekarîya zimistanî kenî. Bozkûrte wina dewam kerde: “Ma firingîyanê tebîîyan ra salça virazenî. Firingîya koyan de resena, tehmê aye cîya yo.”
Bozkûrte qiseykerdişê xo de qala viraştişê salça kerde û wina va: “Badê ke ma firingîyan pelçiqnenî, mîyanê bîdonan de 3-4 rojî vindarnenî. Firingîyê ke ma tîje de verdanî, suzgeç ra derbas kenî û dekenî mîyanê tewreyan. Bi no qeyde firingîyî awa xo veradanî. Ma awa firingîyan 2 rojî tîje de verdanî. Wexto ke tayê tîr bi, ma sole kenî û seba zimistanî hewanenî.”
MA / AMED