Abdulkadîr Ekîncîyo 67 serrî ke Amed de çalakîya Nobeta Demokrasî de cayê xo gêno, emrê xo zafane bi hemaltî û karkerîye derbas kerdo. Ekîncîyo ke her roje beşdarê çalakîye beno û wina vano: “Ganî partîyê înan, tevgerê cinî û ciwanan û dezgehê Kurdîstanî alternatîfê xo bivînî û wayîrê heqanê xo bivejîyê.”

Wezaretê Karanê Zereyî 19ê Tebaxe de şaredarîyê Amed, Wan û Mêrdînî xesp kerdî û herinda hemşaredaran de qayûmî tayîn kerdî. Xespbîyayîş û tayînbîyayîşê şaredarîyan ra nata çalakîyê protestoyî dewam kenî. Sere de Amed, Wan û Mêrdînî de çalakîyê Nobeta Demokrasî dewam kenî.

Bajarê Amedî de her roje cadeyê Lîse yê Yenîşehîrî de bi seyan kesî yenî têhet, xespbîyayîşê şaredarîye û tayînbîyayîşê qayûmî protesto kenî. Çalakgêran ra yew zî bi nameyê Abdulkadîr Ekîncîyo 67 serrî yo. Ekîncî ge hêgayê xo de ke kedkarîye keno, ge mîyanê hewte de beşdarê çalakîye beno. Ekîncî her roje vernîya berê şaredarîye de wayîrê îradeya yê xo vejîyeno.

Ekîncî cuya xo ya 67 serran de zaf zehmetîyî dîyî. Rîyê doza gonîye ra, dewa Qêmêzî ya Mêrdînî ra koçê qezaya Sûrî ya Amedî kerdo. Ekîncîyî ajansê ANF ra Denîz Îke rê qisey kerd. Ekîncîyî dîyar kerd wexto ke înan dewa xo ra bar kerdo o 12 serrî bîyo û wina dewam kerd: “Ma o wext zaf dej û zordarîye ante. Ez eşkena vaja ke keyeyê ma talan bi. Birayê min o mi ra pîlêr tewqîf bi.”

Sûr de zaf Armenîyî estbî

Ekîncîyî persê ‘Kurdan ra ver Sûr de sewbîna şarî estbî?’ ser o wina va: “Xora o wext kesî qala Kurdan nêkerdêne. Tayê Kurdî yê ke qirkerdişê Newala Zîlane û Agîrî ra xelasîyaybî, ameyêne tîya. Rewşa înan zaf xirab bî, verê beran de parsekî kerdêne û hemwelatijan ra nan waştêne. Sûr de zaf Armenîyî estbî, rîyê zulm û zorbazîye ra zafê înan bar kerd, şîyî Stenbol.”

25 serrî hemaltî kerda û hêgayan de xebetîyayo

Cuya Ekîncîyî zafane bajaranê Tirkîya de vîyarte. Ekîncî pare kerd ke o serrêk Îzmîr de, 18 serrî Stenbol de û 6 serrî zî Mersîn de mendo. Cuya 25 serran ya Ekîncîyî bajaranê Tirkîya de bi hemaltî û karkerîya hêgayan vîyarta. Dimayê hende serran, Ekîncî reyêka bîne agêrayo welatê xo. Ekîncîyo ke qiseykerdişê xo de Amedî rê vano Cîyarbekir, wina qala agêrayîşê welatê xo keno: “Xora ez rîyê hedîyeanê sîyasîyan ra şîya Mersîn. Mi wextêk uca de dikandarî kerde. Mi dî nêbeno, ma 2002 de agêrayê Amed. Wextêk ma Amed de mendê, debarê ma baş nêbi, ez şîya dewe. 7 serrî dewe de menda. Mi hêga ramit, keyeyêk viraşt. Nika zî ge-ge ez şina û yena.”

Ez bibîyêne, mi qebul nêkerdêne

Ekîncîyî da zanayene ke pêro heqê cuyayîşî Kurdan rê ameyo qedexekerdene û wina domna: “Ganî partîyê înan, têgêrayîşê cinîye û ciwanan, sazgeh û dezgehê Kurdîstanî alternatîfê xo bivirazê û vera bêhuqûqîye de wayîrê heqanê xo bivejîyê. Sîyasetê AKPyî yê qayûmî xespkerdişê heqan o. Eke tayêk şeref qayûm de esto, wa  îstîfa bikerdêne. Ez bibîyêne, mi qet na bêşerefîye qebul nêkerdêne. Destsernayîşê îradeyî yê şaran, bêşerefîya pîl a.”

 

AMED