MEHMET ŞAH ORUÇ/LEZGÎN AKDENÎZ / MA/XARPÊT
Dewê Xarpêtî de telukeya rijyayişê keyeyan ser o dewijî nêeşkenê keyeyanê xo de sitar bibê, no ser bine serdî de cuyenê. Hema zî Xarpêt de erzlerzê şenik virazyenê. Taybetî dewê Xûxî de zaf keyeyê erdlerz de zirar dîyê. Hetanê nika hêzê dewlete dewijê Duygulu û Tarlatepeyê Xarpêtî rê tena çadir resnayê, serdbîyayişê hewayî ser o zî dewijî zaf bi maxdûr ê.
Keyeyanê ma hema zî leqayenê
Dewij Ramazan Îndîbayo ke dewa Tarlatepeyî de maneno vat ke hetanê nika dewa înan rê hetkarîyêk nêameya, keyeyanê înan erdlerz de ziraro bi gird dîyê, keyeyê înan her tim leqyeno û ê zî tersenê.
Îndîbay wina vat: “Roja erdlerzî rê nika ma ra hetkarîyêk nêameya kerdiş, seferberîya hetkarî destpê kerda la ma rê çik nêresa. Çew nêame berê ma. Ma nika zaf mîyanê zehmetî de yê. Seba tamîrê keyeyanê xo, ma hetkarî wazenê. Xo ra krîzê ekonomîye estbî, erdlerz zî ma maxdûr kerd. Ma perişan ê û hetkarî nêrase ma.”
Hewna welatij Burhan Dengîz zî dîyar kerd ke xesardîyîşo gird ser o nêeşkenê keyeyanê xo rê bikewê, nika nêçare çadiran de cuyenê û wina domna: “Seba ke hewa zaf bi serd o, no ser çadir qiym nêkeno û ma persgirekê germbîyayişî cuyenê. Ma nêweş kewt. Dew de her kes nêweş o. Taybetê keyeyê bi xesar zaf ê.”
Ma nêeşkenê çadiran de cuye bikê
Dewijo bîn Bekîr Dengîz zî pare kerd ke ê tena karê pezkarî û citkarîye kerdinê û wina deam kerd: “Nika Xarpêt de hewa binê sifirê 15î yo. Seba ke ekonomîya ma baş nîya, ma nêeşkenê debara xo bikê. Zereyê keyeyanê ma de dêsî rijyayê. Tikey mendo banê ma birijyê. Ma nêeşkenê keyeyanê xo rê bikewê. Çadiran de zî ma nêeşkenê zaf bi dem bimanê. No ser ganî çareserîyêka bi mende şert a.”
Rojnamegeran demo ke waştî dewa Çevrîmtaşî ra şîrê, rayîr de lejkeran înan rê astengî vetê û tepa erşawitê.