Badê qetlîyamo ke yurdê Aladagî yê Edende de qewimîya û netîceyê ci de 11 doman û 1 xebatkar pêro 12 kesî merdî, rîskê cemat û tarîqatê ke bi serran o Egîtîm Senî qala înan kerdêne, vejîyayî raste. Sekreterê Egîtîm Senî Ebru Yîgîte babete ser o qisey kerde.
Hemkarîya ci dewlet a
Yîgîte qiseykerdişê xo de va ‘Ez sifteyîn seba keyeyê kesê ke merdbî rê serweşî wazena’ û qiseykerdişê xo wina domnaye: “Qetlîyam bi hawayo aşkere bîyo. Dewlete 15ê temuze ra ver cematê Gulenî reyde hemkarîye kerdêne, ewro zî bi cematê Suleymanîyan hemkarîye kena. Yurdê tarîqatî bac zî nêdanî û mekanîzmaya kontrolî înan ser de çin a. Îqtîdaro ke bi viraştişê rayîran pesnê xo dano, heta nika yew mekteb daxî nêviraşto. Domanî seba perwerde dîyayîşî mecburî bi seyan kîlometre rayîr şonî û cayê ke şonî de zî dewlete yurd nêvirazena û domanan mecburê tarîqat û cematan verdena. No qetlîyam netîceyê polîtîkayanê dewlete yê bi serran de vejîyayo orte.
Her serr domanî mirenî
Yîgîte dewamê qiseykerdişê xo de va ‘netîceyê nê polîtîkayanê dewlete de bi seyan domanî sey weqfa Ensarî de raştê îstîsmarî yenî’ û wina dewam kerde: “Hukmatê AKPyî herinda ke dibistan û yurdan bivirazo, perwerdeyo bikiriştiş virazeno û netîceyê nê polîtîkayan de zî her serre bi seyan domanî mirenî. Hukmatê AKPyî herinda ke perwerdeyî domanan ser de bido ferzkerdiş, perwerdeyê dînî dano ferzkerdiş. Nê semedî ra qatilê nê domanan dewlete bi xo yo.”
DÎHABER / ENQERA