Mabênê Amedspor û Fenerbahçe de di rojî verê Amed de maçê Kupaya Tirkîya ya Zîraatî ame kaykerdiş û hetgirê Amedsporî zaf eleqeyêko gird nîşanê maçî dayî, la hûmara hetgirê Fenerbahçe zaf kêmî bîye.
Wextê maçî de hûmara polîsan qasê hetgiran zafe bîye. Verê cû wexto ke Fenerbahçe seba maçî teyara reyde ameye Amed, hetê hetgir û îdarekaranê Amedsporî ra bi vilikan reyde ameyî pêşwazîkerdiş. Hetgirê Amedsporî zî seba taximê Fenerbahçe eleqeyêko gird û heskerdişê xo nîşan dayî; çimkî şarê Amedî şarêko mêmanperwer o. Maç de futbolbazê Amedsporî zaf bizerrîye kay kerdêne, la ganî nê tarzê kaykerdişî tena vera Fenerbahçe de nê, heme maçan de wina kay bikerî. Eke wina bibîyêne nika Amedspor rêza hîrêyine de nêbînê.
Amedspor vera Fenerbahçe de têkoşînêko gird da û netîceyê maçî 1-1 qedîya. Maç wina qedîya la polîsê dewleta tirkî nê netîceyî hezm nêkerdî û maçî ra dima hêrişê futbolbazê Amedsporî kerdî. Netîceyê hêrişî de futbolbazê Amedsporî ra Mehmet Siddik Îstemî, Mansur Çalar û Ercan Çapar birîndar bîyî û sewqê nêweşxaneyî bîyî. Reyna nê futbolbazan ra Mansur Çalar hetê polîsan ra ame tepiştiş û dima ra serbest veradîya. Merdim wexto ke nê kerdişan ra ewnîyeno, vîneno ke zîhnîyetê faşîzan hende aver şîyo ke êdî xo her ca de nîşan dano.
ZAFER TUZUN / AMED