Serokê Komela Alewiyan yê Hubyar Sûltan Alî Kenanoglû derheqê polîtîkayanê dewlet yê alewiyan, Ajansa Firatî rê qiseykerd. Kenanoglû aşkere kerd ke, tekoşîna Kurdan û alewiyan dewlet û hikûmet tersna.

Alî Kenanoglû hayr ant polîtîkayanê înkar û îmha yê dewlet ser û aşkere kerd ke, hometa alewî şarê Kurd rind fehm kena.  û niya va: “Alewî nika destê xo derg kenê, çike tarix de alewî raştê polîtîkayanê înkar, îmha û asîmîlasyonî ameyê. Senî ke, alewiyan terteleyê 1915î de çêberê xo seweta Ermeniyan kerdî a, nika kî serva şarê Kurd kenê a.”


Vîra alewiyan bi qetlîaman tî yo

Kenanoglû vist vîrî ke, alewî zanê ke wextanê antîdemokratîk de, herb û pirodayişî açaryenê alewiyan û aşkere kerd ke, nê wextan de faşîzm beno jêde, çeteyî sonê ser kar. Alewî kî nê wextan de benê hedef. Vîrê alewiyan ebi nê qetlîaman tî yo. 

Kenanoglû qetlîamanê dewlet yê nikayî zey operasyonê şikitenê îradeyê şarî hesibna û da zonayene ke, zey komeleyê alewiyan, îye de rojanê vernî de nûmayişanê xo berz bikerê. Alî Kenanoglû hayr ant rolê sazgehanê alewî yê Awrûpa ser û aşkere kerd ke, ebi viraştişê nûmayişanê kuçe, alewî êşkenê hayrê raya pêroyîn yê Awrûpa biancê Kurdistan ser. 


Wazenê alewiyan bigîrê yêdeg

Ser persa makeqanûna newî de Kenanoglû aşkere kerd ke, Tirkiye de ne îdareyê dewlet azadîwaşt û demokrat o, ne kî makeqanûn azadîwaşt a. Kenanoglû da zonayene ke, tenya jew sebebê rojdem ardişê vûrnayişê makeqanûn esto, o kî sîstemê serokîn o. Ne alewî, ne kî hometê bînî xemê înan niyê. 

Serokê Komela Alewiyan yê Hubyar Sûltan Alî Kenanoglû ard zon ke, çiwext ke Kurdî û alewî amey pêhet, dewlet serva ke alewiyan bianco xo het morîyê hêşîn kena vila û niya qisey kerd: “Bado ke 7ê Hezîran ra tepya Kurdî û alewî amey pêhet û xeta tekoşînê piyayî ronay, dewlet nêrehat bî. Vatiş û temenîyê hikûmet yê serva alewiyan tesadufî nîyê. Serva ke alewiyan hez kenê ra zî nîamey vaten. Tenya jew hedefê hikûmet esto, o kî yêdeg kerdişê alewiyan o. Operasyonê alewiyan Kurdan ra dûr vistiş o. Nayî ra, derheqê cemxaneyan de çend gamî erziyenê. La nê gamî goreyê waştenanê alewiyan nîbenê, goreyê waştenanê hikûmet benê. 


Îbadetxaneyê ma cemxane yê

Derheqê vatişa serokê dîyanet Gormez’î ya ‘cemxaney xeta ma yê sûr’î yê de, Alî Kenanoglû da zonayene ke, Dîyanet, alewitî zereyê îslamîyetî de zey tarîqatek vînena û qiseyê xo niya ramit: “Nayî ra dîyanet îbadetxaneyî zey cem, îbadetî zey nemaz, roceyî zey remezan vînena. Cemxaneyî zey zikirxane, cem kî zey zikir yeno qebûlkerdin. Kenanoglû vist vîrî ke alewî cemxaneyan zey îbadetxane, cem’î zey îbadet, zey roce zî roceyê Xizir û Miharemî qebûl kenê. Nayî ra, hetê teolojîk alewitî îtiqatê da ciya ya.  Kenanoglû ard zon ke, dewlet her tim bi behaneyê tîvarî îtiqatê alewitî zey taloke vînena û zey xeta sûr qebûl kena. 

Serokê Komela Hubyar Sûltan’î derheqê fetwayanê dîyanet yê derheqê alewiyan de aşkere kerd ke, gune dîyanet bîro giroten û hurendiya ci de jû sazgeha bîn bîro ronayen û niya va: “Gune sazgeha newî de temsîliya  pêrokîn îtiqatan ca bigîro.  


 ANF/ ÎZMÎR