Tirkîya û Vakurê Kurdistanî gam bi gam vera weçînayinê neweş şinê. O weçînayino neweyo zî 1’ê mijdar de viraziyo. O yo winî asyeno, ê siyê ki 7’ê hezîran de cayê xora leqay, iyê 1’ê mijdar de cayê xo de ronişê.
Sebebê leqayinê ê siyan serkewtinê HDP bi. HDP bi serkewtinê xo ê 7’ê hezîrana teniya planê Erdoganî nêxeripinay, eynî wext de, tarîxê Tirkiye de rîpela newî akerd. Raya demokrasî akerd. Çimê şaranê Tirkîya akerd. Raya perskerdinê hesabê kiştoxîn û tiritoxînê risqê qeçikanê welatî, mûsnê şaranê Tirkîya. Yanî HDP teniya verniyê serokînê Erdoganî nêgirot. Zeki Erdoganî zî vat, hedefê ey û AKP ê 2023 jî xeripinay.
Erdogan û AKP mesaja 7’ê hezîrani rast fam nêkerd. Coka bi destê gladyoya xo, konseptê lejî vist dewre. Wast bi ê konseptiya heyfê 7’ê hezîran bigiro. Coka siyasetê serranê 90 vist dewre. Vat qayê, o yo bi kişiyayinê lejker û polîsana, tiritoxînê xo bido vîrakerdin. Vat qayê, o yo bi rayanê lejê lîmin ê serranê 90, bişo şarê kurd bitarsayno. La belê tiya zî hesabê ci şaş vejiya. Çimki dewlet ê serranê 90 bo zî, kurdî ê seranê 90 niyê.
Şertî welat û teverê welatî de vuriyayê. Kurdan xo rêxistin kerdo. Dewan ra hetanî metropolan, hema hema kurdê bêrêxistin nêmendê. Eynî wext de, hinî çimê şaranê Tirkiye abiyayo. Iyê hinî zey serranê 90 qeçanê xo çimgirotey nêrêşenê lej. Merasimanê cenazeyan de nêrazîbiyayin mûsinenê. Hinî lejê lîminî, zey lejê welatî nêvînenê.
Teverê welatî de zî konjoktor zey serranê 90 niyo. O çax dewlet, quwet û çoşmeyê dostê dewleta tirk bî, nika ya biyê dostê kurdan û yan zî bêhet manenê. Medyaya o çax, gerîlay zey terrorist diyê, nika pawitoxê merdimîn vînenê. Hinî keverê xeylê dewletan siyasetkaranê kurdan rê abiyayê. Verî sekreterî biyê mûxatabê siyasetkaranê kurdan. La belê nika, serekkomar, serekwezîr û wezîrê dewletan biyê mûxatabî. Zey nimûneyê Stockholm hinî Wezîrê bade pêdiyinan, bi siyasetkaranê kurdan piya vejiyenê verniyê rojnamevanan.
HDP şertanê winayinan de kewna weçînayinê 1’ê mijdar. Hem zere û hem tevera şertî, hinî xizmetê AKP nêkenê. Hinî şîrketê anketanê nezdiyê AKP zî, nêşenê berzbiyayinê HDP binimnaynê. Şîrketê nezdiyê AKP zî vanê, rayê HDP her roj heveyna benê vêşî. Senî ki xeta PYD Rojawa û Suriye de biya ûmidê şaran, Vakurê Kurdistan û Tirkiye de zî, xeta HDP biya ûmidê şaranê Tirkîya. Heme îşaretî mûsnenê, 1’ê mijdar de zî, ûmidê şarano qezenc bikiro.
Memed Drewş