Dewleta qirker, dewleta tirk, qirkerî ra fek verenîdana. Wextê Şêx Seîdî de sekerd, nika eynî çîyan kena.
Wextê Seyît Rizayî de Dersîm de sekerd, nika eynî çîyan kena. O wextî ‘Plana Şerq Islehat’î (Şark Islahat Planı) viraşt. Dewlet verê cû 1925-1938î de Vakûrê Kurdistanî de komkiştiş viraşt. Ne dew verda, ne bajar. Ne keye verda, ne gumî. Ne ware verda, ne zî xêm. Pêronê ca û ware şarê kurdî veşna. Pêronê starîya şarê kurdî veşna.
Zad û îsqaqê şarê kurdî talan kerd. Bax û baxçe şarê kurdî veşna. Zerd û sîmê keyna û cinîyê kurdan talan kerd. Dest na ser dewar û bizinê şarê kurdî ro. Kam sermîyanê şarê kurdî bi kişt û aliqna. Pîzê dadîyan de qijê kurdî kiştî. Dima ra şarê kurd surgine Anatolîya kerd. Dadî û tutê kurdî cîya kerdî. Keyna û cinîyê kurdî rotî. Bi kilmêkî ser şarê kurd û Kurdistanî qirkerdiş kerd. Dewleta tirk nika zî eynî plan ramnena. Verê pêronê çimê dinya hina kena. Heme çî eşkera yo. Plana Şerq Îslahatî çi bî, ‘Planê Çokdayîşî’ (Çokturme Planı) zî hina yo.
Dewleta tirkî Elûlê 2014 de Planê Çokdayîşî awankerd. Gore nê planî dewleta tirkî Kobanê û Rojavayê Kurdistanî vistênî. Dima ra zî pêronê Vakurê Kurdistanî de zî hikumranîya xo beyankerdêne. Plane dewleta tirk Kobanê û Rojavayê Kurdistanî de sernêkewt. Dewleta tirkî senî Rojavayê Kurdistanê de binkewt, hêrîş kerd ser Vakurê Kurdistanî.
Vakurê Kurdistanî de şervanê YPS û şarê kurd hina xoverdayîş kerd kî, dewleta tirkî Vakurê Kurdistanî de zî sey Rojavayê Kurdistanî binkewt. Dewlata tirk dî ke binkewna, pê (bi) tanq û topan, helîkopter û teyareyan, pê dozeran bajarê Kurdistanî xirab kerdî. Mal û milkê şarê kurdî talan kerd. Tayî taxan de kerra ser kerra (sî ser sî) de nêverda.
Şarê Kurd bê starî kerd. Dewleta tirk hina wazena ke şarê kurd bê starî bimano, koçê cayê bîn bikero û uca de qir bikero û bikero tirk. Yane dewleta tirk ser şarê kurdî planê qirkerdişî ramnena. Yew wezîrê dewşîrme yê Qayserijî esto. Nameyê eyê Mehmet Ozhasekî yo. Eşkera vano, “Ma nêverdenê yew teberê îznê ma de yew keye Amed-Sûr de bivirazo. Kam teberê îznê ma de keye virazo, ma eyê erzenê zîndan. Ma Mêrdîn, Riha û Stanbol de keyeyan virazenî. Kam biwazo eşkeno şêro û ûca de biciwyo.”
Wezîre AKP’yij eşkera û eşkera vano, ma şarê kurdî surgin kenî. Ma planê qirkerdişî ramnenî. Heme çî hina eşkera yo. Qey (serva/qandê) şarê kurdî tebere xoverdayîş yew rayîr çîno. Şarê Kurd wayîrê şerefîyo, qirkerdiş û tirkbîyayîş qebûl nêkeno.Şarê Kurd ke senî ke 40 serrîyo xover dano, hezar serrê bînî zî êşkeno xoverdayîş bikero.