Akademîsyene Nurîye Gulmene û Mamosta Semîh Ozakçayê ke grevê vêşanî daybî destpêkerdiş, grevê înan roja 155. de dewam keno. 41 kesê ke çalakîya piştîdayîşî viraştbîy û ameybî tepiştiş, bi şertê kontrolo edlî serbest ameyî veradayîş. Ame dîyayîş ke kesê ke ameyî tepiştiş, raştê îşkenceyê polîsan ameyî. Laşê nê kesan de şopê îşkenceyî estbîy.Babete ser o kesê ke raştê îşkenceyî ameyî, qisey kerdî.

Avûkate Barkin Tîmtîke va ‘nêyî seba ke waştişê heqdar yê Nurîye û Semîhî nêrî vînayîş, yenî kerdiş’ û wina dewam kerde: “Badê îşkenceyan seba ke mesaj bidî şarî, serbest veradayî. Nê sîyatîyê ke laşê ma de yî, parçeyê teslîmgirewtişê şarî yî. Ma hema rîyê dozger û hakimî nêdîbî, qerarê kontrolo edlî daybî. Grev ewro roja 155. de yo û ma zere de hûmaritişê nê rojan domna. Ma do rûmetê xo nêdî pelçiqnayîş.”


Ma do bibî vengê înan 

Rojnamegere Pembegul Gokçeke zî va ‘ma seba rojnamegerî ewja de bîy û ê bi her hawayî îşkence bi ma kerdî’ û wina domnaye: “Bi hawayo kêfî mi tepiştî, no vera çapemenîya azade de hêrişêk o. Wazenî ma bitersnî, la ma do xoverdayîşê xo ra tavîz nêdî û bibî vengê înan.”Buse Bayrama ke wendekara unîversîte ya zî, wina va: “Heqê ma yê weşîye destê ma ra girewtî. Ma ra vatî ma doktor eyar kenî û bi no hawa bi saetan mîyanê wesayîtî de bi hawayo çep kelepçekerde ma dayî vindarnayîş. Nêyî seba tersnayîşî yenî kerdiş. Polîsan ma tehdît kerdî û nê îşkenceyî hêrsê ma hîna zêde kenî.” 

Pawitoxa heqî Gulay Altioke zî çîyê ke cuyaya, wina arde ziwan: “Ma dewamê merdimê ke ameyî qetilkerdiş û îşkence bi înan ameyî kerdiş î. Wexto ke ma wesayît de kelepçekerde bîy, polîsan marşê ‘Ez mirena Tirkîyaya mi’ cinitî û bi zorî bi ma dayî goşdarîkerdiş. Heme cayê ma birîn î; doktor, dozger, hakim û polîsan hemînan îşkenceyê ma kerdî. Dewleta Komara Tirkîya rêxistina sucî ya.”Wendekara unîversîte Mervenur Avşare zî va ‘dozgerî îfadeyê ma nêgirewt’ û wina domnaye: “Waştî ke doktor bîyarî Mudurîya Asayîşî ya Vatanî. Labelê ma qebul nêkerd. Kontrolê weşîye yê ke ame kerdiş, ma rê bî îşkence. Porê ma tepiştî û ma erdî ra kirêştî. 3 rojî îşkence bi ma kerdî. Se beno wa bibo, ma do piştî bidî înan û bibî vengê Nurîye û Semîhî.” 


 STENBOL