‘Dewlete bi xo piştî dana nêhêrişan’

Çend rojî verê grûbêka faşîste hêrişê cenazeya Dayîka Hatun Tugluke kerdbî û hêriş ra dima cenaze mezelî ra ameybî vetiş û Dêrsim de ameybî definkerdiş. Ewja de parlamenteranê HDPyî bi vindetişê xo vernîya girdbîyayîşê hedîseyî girewtî.Gelo no hedîse yê sifteyîn bî? Cewab helbet ke ney o. Haci Lokman Bîrlîk ra heta Ekîn Wane, Rozerîn Çukure ra heta Dayîka Taybete tarîx de xeylê cenaze û mezelê kurdan raştê hêrişî ameyî. Tena kurdî zî nê mezelê armenî, rûm, cihû û yê sewbîna şaran zî ameyî taxrîbkerdiş.Babete ser o Parlamenterê HDPyî yê Çewlîgî Hişyar Ozsoyî qisey kerd. Nîjadperestî ra ver çîyêk çin o

Ozsoyî va ‘faşîzm mefhûmêko spesîfîk o û seserra 20. de vejîyayo orte’ û wina dewam kerd: “Helbet muameleyo ke vera cenazeyan de ame kerdiş, tena faşîzmî reyde sînordar nîyo. No hedîse tragedyaya Antîgone ya Sofoklesî de zî derbaz beno. Reyna xeylê mîtolojî û tarîxê kurdan de zî meseleyê winasîyî estî. Labelê meselaya nîjadperestî ya merdeyan reyde hîna taybetin a. Na mesele nîjadperestî ra ver çin a. Tîya de 2 çîyê muhîmî estî; nînan ra yewe bedeno neteweyî yo bîn zî bedeno bîyolojîk o. Xora her di bêrî têhet, vatişo ke Îstîklal Marşi de bi hawayo ‘şehîdî vejîyenî eke ti herre bikenî’ vejîyenî orte. Nîjadperestî ra ver çîyêko winasî çin o û çi merde û çi zî herre hende nêameyî pîrozkerdiş. Nîjadperestî şerê xo bi no hawa kirişenî dinyaya bîne zî. Çimkî ê baş zanî ke merg çîyêko pîroz o, wazenî manaya mergî orte ra wedarnî. Wazenî merdeyan ser ro gandaran reyde pêrobidî. Nika xeylê cenazeyî destê dewlete de estî. Dewlete no donem de wazena wayîrê warê merdeyanê kurdan zî bivejîya. Kurdî zî wayîrê nê warî vejîyenî û têkoşîn danî.” Binê hakimîye de rejîmê mergî esto

Ozsoyî va ‘Tirkîya de çarçewaya awankerdişê netewe dewlete de 100 serrî yo ke wazenî herinda şaranê bînan pak bikerî’ û wina dewam kerd: “Goreyê nê fikrî heta nika zafaneyê mezelê armenî, cihû û rûman ameyî pakkerdiş. Wina kenî ke nê şarî siba roje nê erdan ser de heq nêwazî. Seba kurdan zî seke yeno zanayîş mezelê Şêx Seîd û Seyyîd Riza înan nîno zanayîş ke kura de ameyî definkerdiş. Yê kurdan zî tîya ra dest pêkeno. Binê hakimîya dewleta tirkî ke erdanê kurdan ser de ronaya de rejîmê mergî esto.” 

Ozsoyî qiseykerdişê xo de qala hêrişo peyên zî kerd û wina va: “Ez zî cenazeya Hatun Tugluke de bîya. Ewja de hêrişkaran vatênê ‘şima nêşenî tîya de armenîyan defin bikerî’ hetta mîyanê hêrişkaran de yewî vatêne ‘tîya de şehîdê ma definkerde yo’. No yeno manaya ke bedenê kurd, armenî, elewî û sewbîna bedenê merdeyanê ma lêmin kenî. Yanî no hêriş hêrişê çend nezanan nîyo. Erdogan serê sibayî ra heta şanî vano ‘yê ke oxirê welatî de bimiro, o pîroz o’. Dewlete bi xo piştî dana nê hêrişan. Reaksîyonê ke vera hêrişkerdişê cenazeye de bîyî, seba Haci Lokman Bîrlîk û Ekîn Wane nêameyî nawitiş. Eke herinda dayîke de cenazeyêka gerîla bibîyêne, do se bîyêne? Meseleya esasî na ya. Yanî meseleya esasî polîtîkayê dewlete yê ke vera merde û goristananê kurdan de yenî meşnayîş î. Reaksîyono ke vera cenazeya Hatun Tugluke da ame nawitiş, baş bî ganî ma nêyî hîra bikerî.”