ZEYNEP KURAY/ ANF
Taxê Alîpaşa û Lalebeyî yê qezaya Sûrî ya Amedî de hetêk ra rijnayîş dewam keno û heto bîn ra zî zext û tedaya polîsan şarî ser de her ke şono zêde beno.
Babete ser o Endamê Platformê Piştîdayîşê Sûrî û Pawitişê Bajarê Stenbolî Denîz Ozgurî qisey kerd.
Ozgur nika çarçewaya kampanyaya ke hetê Platformê Sûrî ra ameybî destpêkerdiş de Stenbol de xebetîyeno. Ozgurî dîyar kerd ke hedefê ma o yo ke ma Stenbol de derheqê Sûrî de hesasîyetêk awan bikerî û wina domna: “Hema vaje Taxa Alîpaşa de heme keyeyî ameyî rijnayîş û nika dore de Taxa Lalebeyî esta. Raştîya xo de hukmatî waştbî ke 2013 de nê qerarî bierzo dewre, la seba ke şarî xover da, nêşînayî bikerî. 3 serrî yo ke ser taxijan de tedayêka psîkolojîke yena meşnayîş.”
Ozgurî va ‘çîyê ke Sûr de qewimîyenî, seba taxijan vurîyayîşê bajarî nîyo’ û wina dewam kerd: “Herçiqas ke Sûr wayîrê tarîxêko 7 hezar serran o, labelê çimê dewlete de sey cayê rantî yeno dîyayîş. Seba ke kesê ke Sûr de cuyenî weçînayoxê HDP yî, hukmat wazeno sifteyîn înan ewja ra vejo. Dewlete nêşena ewja de hakim biba. Heto bîn ra UNESCO zî vera nê rijnayîşî de bîye ortaxê sucî.”
Ozgurî peynîya qiseykerdişê xo de wina va: “Dewlete do huzirê tarîx û dezgeyê mîyanneteweyî de mehkûm biba. Qetlîyam û rijnayîşê ke ewja de benî do bêhesab nêmanî.”