Veriya çend rojan dewa Badan yê qezaya Mûş Gimgim de mavêna quwetanê dewlet û gerîlayanê HPG de lej û pirodayişî vejyay. Gerîlayê HPG Dogûkan Kaya bi nameyê kod Dewran Kanîreş û hîrê alwozê ci nê pirodayişan de weşiya xo kerdî vinî.
Cenazeya Dewran Kanîreş’î hetê malbata ci Sazgeha Tipa Edlî yê Mûş ra amê giroten. Cenaze bi seyan konvoyî ra piya berdiya dewa Kargapazar yê qezaya Çewlig Kanîreş. Welatijan zî dekewtişê dew de cenaze bi sloganê ‘Ey şehît gonîya to erd de nîmanena’, ‘Şehît nêmirenê’ û ‘Bicuw Serok Apo’ pêşwazey kerdî.
‘Na ray de canê ma feda yo’
Cenaze ser doşanê welatijan de berdiya camî ya dew û ewja de wecîbeyê dînî ardiyayî ca. Badê ca ardişê wecîbeyanê dînî cenaze hetê seyan kesan berdiya mezelxaneyê dew û ewja de amê definkerdiş. Parlamenterê HDP yê sûk Hişyar Ozsoy û Hemşaredarê Gimgim zî malbata Kaya tenya nêverda û tewrê merasîma cenaze bî. Pîyê Dewran Kanîreş Fettah Kaya qisey kerd û va, ‘na rayirî de canê ma feda yo, wa sereyê Kurdistan weş bo’. Badê merasîm welatijî semedê serweşî, şî keyeyê Kaya yê dewa Kargapazar.
Karakaya Tatan de defin bî
Gerîlayê HPG Ûygar Karakaya ke pirodayişê Gimgim de weşiya xo kerd vinî zî dewa Tatan yê Gimgim de defin bi. Cenazeya Karakaya şewa bîn bi desan konvoyî berdiya dewa Gimgim Tatan. Cenaze hetê seyan kesan mezelxaneyê dew de bi slogana ‘Şehît nêmirenê’ defin bî.
DÎHA/ÇEWLIG