Yew mesala esta. Çîyo ke di axayî na mesela de kenê. Senî pê rişwetî wazenê xo heqdar vejêne, hina rişwet danî Amerîka û Ewropa, înan ancenê hetê xo û ser şarê kurdî de zilme xo ramnenê. A mesela hinaya:
Vanî yew dewe de, di hebî axayî benê. Tim û tim reqabet de yê. Rojek yew mesela ser munaqeşe kenê. Piya nêkenê vanî ‘ma şirê şerîet. Rojê xo tayin kenê û cêbiryenê, şinê keye. Roja ke verê rojî şerîetî axayan ra yew şino melayî hete vano: “Mela siba ma yenê to hete şerîet. Mi vato heş leyîran keno û zêdîyeno. Wa to vîr de bo.” Dima zî yew kîseyê zerdan geno keno binê kulavî ra û kuweno tever. Ey dima axayo bîn kuweno zerre. O zî vano: “Mela ma siba yenê to het şerîet. Mi vato heş hakan keno û zêdîyeno. Wa to vîr de bo.” Dima O zî yew kîseyê zerdan keno binê kulavî ra. Dano piro şino keye.
Rojê şerîetî de hurdî axayî yenê melayî hete. Mela ewniyeno hetê kamî vajo, O bîn hêrs beno. Vano: “Mi şerîetê şima kerdo. Heş xo ser yew heywan o. Canê ey waşt leyîran keno, keyfê ci waşt hakan keno.” Herdi axayî zî na cewabê melayî ra mat manenî. Ewniyenî yewbînan ra, danê ra şinê.”
Zê na mesela, Rojhilato Mîyanên de zî di dewletî estî. Tim û tim fesadî kenî, çeteyan awankenî û şirawenî ser şarê Rojhilatê Mîyanên. Ça de çeteyên Vahabî û Selefîyan û Tirk-Îslamîst estî nê her di dewletî înan rêxistinkenî.
Qalê dewleta Tirkîye û Erebîstanê Suîdî kena. Seba şarê kurd Rojava, Başur, Bakur û Rojhilatê Kurdistanê de nêresê heqanê xo, rişwet danî Amerîka û Ewropa, eyê zî hina bêveng manenê. Nika eynî çi, seba Rojavayê Kurdistan û Bakurê Kurdistanê kenê. Bakurê Kurdistanê de dewleta Tirk hêrîşe bajaranê kurd kena, komkiştiş kena, la pê rişwet Amerîka û Ewropa bêveng kena.
Seba ke Kurdê Rojava beşdarê Kombîyayîşê Cenew nêbenê dewleta Tirk û Erebîstana Suîdî çi dest înan yeno kenî. Amerîka û Ewropa zî rişwete xo genî û her dîyan zî îdare kenî.